Umwepiskopi wa Diyosezi ya Kabgayi, Nyiricyubahiro Musenyeri Balthazar Ntivuguruzwa yagaragaje ko ibibazo by’intambara n’amakimbirane mu bihugu bitandukanye bikomeje kugira ingaruka zikomeye ku isi y’umurimo, ashimangira ko bikwiye gushakirwa ibisubizo binyuze mu bufatanye bw’ibihugu n’abafata ibyemezo.
Yabitangaje kuri uyu wa Gatanu tariki ya 1 Gicurasi 2026, ubwo abakozi ba Diyosezi ya Kabgayi n’ibigo biyishamikiyeho bizihizaga Umunsi Mpuzamahanga w’Umurimo, banizihiza Umunsi Mukuru wa Mutagatifu Yozefu, uzwi nk’urugero rw’umukozi mwiza.
Ibi birori byabanjirijwe n’Igitambo cya Misa cyabereye muri Bazilika Nto ya Kabgayi, kiyobowe na Musenyeri Ntivuguruzwa. Mu butumwa yagejeje ku bitabiriye uwo munsi, yibukije ko nubwo ari umunsi wo guha agaciro umurimo n’uruhare rw’umukozi mu iterambere, bidakwiye kwirengagiza ibibazo bikomeje kuwubangamira ku rwego rw’isi.
Abakozi batuye ituro ryo gushima Imana mu Gitambo cya Misa yabimburiye ibirori byo kwizihiza umunsi w’Umurimo muri Diyosezi ya Kabgayi
Yagaragaje ko isi y’umurimo ihanganye n’ibibazo bikomeye birimo ubushomeri, ubukene, izamuka rikabije ry’ibiciro ku masoko, akarengane n’ihezwa, byose bikagira ingaruka ku mibereho y’abaturage benshi.
Yagize ati “Ntabwo twakwizihiza uyu munsi tudakomoje ku bibazo byugarije isi y’umurimo. Irimo guhura n’imbogamizi zikomeye zirimo ubushomeri, ubukene n’izamuka ry’ibiciro ku masoko bigenda byiyongera umunsi ku wundi.”
Yanagarutse ku kibazo cy’intambara n’amakimbirane bikomeje kugaragara mu bice bitandukanye by’isi, bikabangamira ubukungu, umutekano n’iterambere ry’umurimo. Yongeyeho ko isi iri no guhura n’impinduka zituruka ku ikoranabuhanga n’ubwenge buhangano, bishobora kuzana amahirwe ariko na none bikaba byakurura imbogamizi nshya mu gihe bidacunzwe neza.
Musenyeri Ntivuguruzwa yashimangiye ko gukemura ibyo bibazo bisaba ubufatanye bw’ibihugu n’abatuye isi, cyane cyane abafata ibyemezo, kugira ngo haboneke ibisubizo birambye.
Yanahamagariye abakozi ba Diyosezi ya Kabgayi n’ibigo biyishamikiyeho kurushaho kwimakaza ubufatanye mu kazi, kugira ngo barusheho gukora neza no guteza imbere ubukungu bw’ikigo n’igihugu muri rusange.
Ati “Ubufatanye buzatuma tugera ku ntego zo guteza imbere ubumenyi, guhanga imirimo no kubaka ubudahangarwa bw’ubukungu bw’ikigo ndetse n’ubw’igihugu.”
Umuyobozi w’Akarere ka Muhanga, Jacqueline Kayitare, wari witabiriye ibi birori, yavuze ko Umunsi Mpuzamahanga w’Umurimo ari umwanya wo kuzirikana uruhare rw’abakozi mu bukungu bw’igihugu no gushishikariza guhanga imirimo.
Umuyobozi w’Akarere ka Muhanga, Jacqueline Kayitare, yitabiriye ibirori by’umunsi w’Umurimo uri Diyosezi ya Kabgayi
Yagize ati “Uyu ni umwanya wo kongera gushimangira intego yo guteza imbere igihugu cyacu, kuko umusanzu wa buri wese ugira uruhare mu iterambere rirambye.”
Yanashimiye Diyosezi ya Kabgayi ku ruhare rwayo mu guhanga imirimo, agaragaza ko ari urugero rwiza rwo guteza imbere abaturage.
Ati “Diyosezi ya Kabgayi yahisemo guhanga imirimo aho gutegereza iy’abandi, bityo igafasha benshi kubona icyo bakora.”
Ibirori byo kwizihiza Umunsi Mpuzamahanga w’Umurimo muri Diyosezi ya Kabgayi byitabiriwe n’abakozi bayo n’ibigo biyishamikiyeho, birimo Ishuri Rikuru Gatolika rya Kabgayi, Ibitaro bya Kabgayi, Seminari Nto ya Kabgayi n’ibindi. Uyu munsi wabaye umwanya mwiza wo gushimangira akamaro k’umurimo n’uruhare rw’umukozi mu iterambere rya Diyosezi n’igihugu muri rusange.
Muri ibi birori kandi hashimiwe abahoze ari abakozi ba Diyosezi ya Kabgayi bagiye mu kiruhuko kizabukuru
