Kuri uyu wa kane, abashinzwe ubuzima muri Repubulika Iharanira Demokarasi ya Congo bavuze ko indwara imaze guhitana abantu barenga 50 mu majyaruguru y’uburengerazuba bw’iki gihugu muri uku kwezi bicyekwa ko ari malariya cyangwa ikaba yaraturutse ku biribwa bihumanye.
Umuyobozi mukuru w’Ikigo cy’Igihugu gishinzwe Ubuzima muri iki gihugu Dieudonne Mwamba, yatangaje ko abantu 943 byibura bamaze kwandura iyi ndwara, mu gihe 52 bamaze kwitaba Imana mu ntara ya Equateur, bagaragaza ibimenyetso birimo umuriro mwinshi, umunaniro, kuruka no gutakaza ibiro.
Mwamba yagize ati: “Kugeza ubu, isuzuma ryacu rigaragaza ko ari malariya, kandi turanacyeka ko iyi ndwara yaba yaratewe n’ibiryo bihumanye.”
Mwamba yongeyeho ko 78% by’ibizamini byagaragaye ko ari malariya.
Ngashi Ngongo wo mu kigo cya Afurika gishinzwe kurwanya no gukumira indwara (Afurika CDC) yagize ati: “Hari uduce dutanu twibasiwe … Ibizimini byerekana cyane ko iyi ndwara ari malariya.”
Ishami ry’Umuryango w’Abibumbye ryita ku Buzima, OMS ryatangaje ko rigiye gukaza umurego kandi ko rizakorana n’inzego z’ubuzima zaho muri Congo kugira ngo hakomeze gukorwa iperereza kuri iyi ndwara.