Abantu 41 bamaze kwemezwa ko bapfuye, abandi 49 bararokorwa nyuma y’uko ubwato MV MJP bwari butwaye abagenzi n’imizigo burohamye mu kiyaga cya Tanganyika, ubwo bwari buturutse i Kigoma muri Tanzania bwerekeza i Kalemie muri Repubulika Iharanira Demokarasi ya Congo (DRC).
Iyi mpanuka yabaye kuri uyu wa Kane, tariki ya 24 Nzeri 2026, hafi y’Umudugudu wa Mapera, mu Ntara ya Tanganyika muri DRC.
Amakuru avuga ko ubwo bwato bwari butwaye abantu bagera kuri 100, ndetse n’imizigo myinshi.
Minisitiri w’Ubwikorezi mu Ntara ya Tanganyika, Norris Mulongoyi, yatangaje ko ibikorwa byo gushakisha no gutabara byakomeje kugira ngo haboneke abandi bantu bashobora kuba bataraboneka.
Amakuru ya mbere yari yatangajwe na Radio Okapi ku wa 24 Nzeri saa 11:38, yavugaga ko abantu 39 baburiwe irengero abandi 36 bararokorwa mu gihe umubare wa nyuma w’abahitanywe n’impanuka wari utaramenyekana. Nyuma, amakuru yatangajwe n’ ikinyamakuru, Associated Press (AP) yavuze ko abapfuye bageze kuri 41, naho 49 bakaba barokowe
Abatangabuhamya bavuga ko ubwato bwatangiye kugana ku ruhande rumwe mbere y’uko burohama. Impamvu nyayo y’iyi mpanuka ntiratangazwa ku mugaragaro, gusa hari amakuru avuga ko ubwo bwato bwari butwaye imizigo myinshi, burimo ifu y’ingano n’ibinyabiziga, ariko iperereza rikaba rigikomeje kugira ngo hamenyekane niba ibyo bifitanye isano n’impanuka.
Yanditswe na Ushindi Paul Balozi