Kuri uyu wa Kabiri, tariki ya 23 Ukuboza 2025, Ishuri Rikuru Gatolika rya Kabgayi (ICK) ryatanaze impamyabumenyi ku banyeshuri 1,412 barangije amasomo yabo mu mwaka w’amashuri wa 2024–2025, mu mashami atandukanye.
Uyu muhango wabereye kuri Stade ya Muhanga, witabiriwe n’inzego zitandukanye zirimo ubuyobozi bwa ICK, abayobozi b’izindi kaminuza, abari bahagarariye inzego bwite za leta, abanyeshuri barangije amasomo ndetse n’ababyeyi n’imiryango yabo.
Mu butumwa bwatanzwe na Nyiricyubahiro Musenyeri Balthazar Ntivuguruzwa, Umushumba wa Diyosezi ya Kabgayi, akaba n’Umuyobozi w’Ikirenga wa ICK, yashimiye abanyeshuri bahawe impamyabumenyi, abasaba kudacibwa intege n’ingorane bazahura nazo mu buzima, ahubwo ababwira ko bakifashisha ubumenyi bavomye muri ICK bahangana nazo.
Umushumba wa Diyosezi ya Kabgayi, akaba n’Umuyobozi w’Icyirenga wa ICK, Nyiricyubahiro Musenyeri Balthazar Ntivuguruzwa
Yagize ati: “Mwembwe mumaze guhabwa impamyabunyi zanyu, ntimuzemere ko ingorane zabaca intege. Nimukomeze mwigirire icyizere mu mpano mufite, n’ubumenyi mumaze guhaha muri ICK. Mukomeze mutyaze ubwunge, kuko kwiga no kwihugura bitajya bihagarara, kandi muzahore mushingira ku ndagagaciro mwigishijwe muIshuri Rikuru Gatolika rya Kabgayi.”
Yakomeje agira ati: “Murabe koko abambasederi ba ICK mu muryango Nyarwanda ndetse no ku isi yose, ijambo ryanyu ribe ijambo ry’ukuri, ibikorwa byanyu bibere isomo abandi.”
Umuyobozi w’Akarere ka Muhanga w’Ungirije Ushinzwe Imibereho Myiza y’Abaturage, Mugabo Gilbert, yashimiye abanyeshuri bahawe impamyabumenyi, ababwira ko umwete n’imbaraga zabo, arizo zatumye bagera kuri uyu munsi ukomeye kuri bo.
Ati: “Uyu ni umusaruro w’umwete n’imbaraga mwagaragaje mu myigire yanyu. Imbaraga mwakoresheje zitumye mugera kuri uyu munsi ukomeye mu buzima bwanyu. Uyu munsi kandi muhesheje ishema ababyeyi, imiryango yanyu, kandi muhesheje ishema igihugu cyabahaye amahirwe atumye mugera kuri uyu munsi.”
Yakomeje abibutsa ko ubumenyi baherewe muri ICK bakwiye kubukoresha bubaka igihugu cyabagiriye ikizere cyo kwiga.
Ati: “Banyeshuri muhawe impamyebumenyi, muzirikane ko muri imbaraga z’igihugu, ubumenyi mukuye muri ICK mugomba kubukoresha mu gufatanya n’abandi banyarwanda mu gusigasira ibyiza twagezeho, ndetse no guharanira kubyongera.”
Gilbert Mugabo, Umuyobozi w’Akarere ka Muhanga w’Ungirije Ushinzwe Imibereho Myiza y’Abaturage
Bamwe mu banyeshuri barangije amasomo yabo muri ICK, babwiye ICK News ko bishimira kuba barize muri ICK, kuko yabahaye ubumenyi buzabafasha kwiteza imbere,
Tuyiramye Denyse, umwe mu bahawe impamyabumenyi, yashimiye ICK, cyane ko we ayibona nk’umufatanyabikorwa mwiza wamuhaye ubumenyi azifashisha nk’impamba yo kwiteza imbere no guteza imbere igihugu.
Yagize ati: “Ndashima ICK kuko yambereye umufatanyabikorwa mwiza, kandi niteguye gukoresha ubumenyi bampaye nk’impamba yo kwiyubaka no gutanga umusanzu wanjye mu iterambere ry’igihugu cyanjye.”
Nsanzumukiza Damascène we yavuze ko urugendo rwo kwiga rutari rworoshye, ariko ko yishimira ko yarurangije, kandi yiteguye gukoresha ubumenyi yahawe mu kwiteza imbere no guteza imbere abandi.
Ati: “Ni urugendo rutari rworoshye, rwarimo imbogamizi nyinshi, ariko nabashije kuzicamo. Ubu ngiye gukoresha ubumenyi nahawe niteza imbere, kandi mfasha n’abandi bose bakeneye ubufasha kugira ngo nabo batere intambwe.”
Ni mugihe Mujawayezu Cansilida, umwe mu babyeyi bafite abana basoje amasomo muri ICK, yabwiye ICK News ko yishimira intambwe umwana we yateye binyuze mu bumenyi yahawe na ICK.
Yagize ati: “Ndashima cyane ICK yafashije umwana wanjye kugera kuri iyi ntambwe nziza binyuze mu kumuha ubumenyi. Ibi mbibona nk’umusaruro wo kudacika intege, n’ubwo nahuye n’ibigeragezo byinshi, ariko nabashije kubicamo, umwana wanjye mufasha kwiga.”
Umuhango wo gutanga impamyabumenyi ku nshuru ya 15 muri ICK, kuri uyu wa Kabiri, wari wo wa mbere impamyabumenyi zihawe umubare munini wabarangije kuva ICK yashingwa mu 2002, kuko zahawe abangana 1412 bo mu mashami atandukanye. 34 muri bo ni abasoje mu ishami ry’Itangazamakuru n’Itumanaho, 71 barangije mu Ishami ry’Ubumenyi n’Iterambere, abo mu Ishami ry’imibanire y’Abantu, Ubukungu, Icungamutungo n’Ibaruramari ni 121, naho 1,186 bakaba basoje amasomo yabo mu Ishami ry’Uburezi.
Abatsinze neza bahembwe
