Kuri iki Cyumweru, tariki ya 11 Kanama 2024, Perezida wa Repubulika Paul Kagame yarahiriye kuyobora u Rwanda mu myaka itanu iri imbere.
Ni umuhango wabereye muri Stade Amahoro, witabirwa n’Abanyarwanda baturutse hirya no hino, inshuti z’u Rwanda, ndetse n’abanyacyubahiro baturutse mu bihugu byo mu mahanga.
Mu banyacyubahiro bitabiriye uyu muhango, abenshi bari abakuru b’ibihugu bitandukanye byo ku mugabane w’Afurika.
Saa munani z’igicamunsi, nibwo abakuru b’ibihugu batangiye kwinjira maze babimburirwa na Perezida w’inzibacyuho wa Gabon, Brice Oligui Nguema.
Perezida wa Kenya Dr. William Ruto na Samia Suluhu Hassan wa Tanzania binjiye bakurikiranye muri sitade bakirwa n’urufaya rw’amashyi.
Perezida wa Zimbabwe, Emmerson Dambudzo Mnangagwa, Perezida wa Seychelles, Wavel Ramkalawan ndetse na Perezida wa Somalia, Hassan Sheikh Mohamud nibo bakurikiyeho.
Gen. Mamady Doumbouya, Perezida w’inzibacyuho wa Guinée Conakry, yakiranywe Urugwiro akurikirwa na mugenzi we Umaro Sissoco Embaló, Perezida wa Guinea-Bissau
Perezida wa Angola, João Lourenço, Perezida w’inzibacyuho wa Sudani, Abdel Fattah al-Burhan Abdelrahman al-Burhan, ndetse na Perezida wa Centrafrique, Faustin-Archange Touadéra baje kwifatanya n’u Rwanda.
Umwami Mswati wa Eswatini, yakiranywe urugwiro ubwo yageraga muri Stade Amahoro. Uyu muhango kandi witabiriwe na Perezida wa Sudani y’Epfo akaba n’Umuyobozi w’Umuryango wa Afurika y’Iburasirazuba (EAC), Salva Kiir Mayardit.
Perezida wa Madagascar, Andry Nirina Rajoelina, ari kumwe n’umugore we, Mialy Rajoelina, nabo bitabiriye irahira rya Perezida Kagame.
Uretse aba kandi, Perezida wa Ethiopia, Sahle-Work Zewde nawe yitabiriye uyu muhango ndetse ni nawe Perezida winjiye nyuma muri sitade by’umwihariko ku bakuru b’ibihugu
Muri uyu muhango kandi, inshuti z’u Rwanda harimo n’abayarwanda barimo abahoze ari abakuru b’ibihugu byabo, abayobozi mu nzego zitandukanye ku mugabane wa Afurika ndetse n’abagarariye ibihugu byabo bagera kuri 10.
Ni ubwa mbere, uyu muhango wari witabiriwe n’abakuru b’Ibihugu benshi ugereranyije n’indi myaka (2017,2010 ndetse na 2003).