Urwego Ngenzuramikorere (RURA) rwatangaje ko guhera ku itariki ya 05 Werurwe 2026, saa kumi n’ebyiri za mu gitondo , hatangira kubahirizwa ibiciro bishya by’ibikomoka kuri peteroli.
Mu itangazo ryashyizweho umukono n’Umuyobozi Mukuru wa RURA, Rugigana Evariste, ryo ku wa 04 Werurwe 2026, hagaragajwe ko lisansi yagumye ku mafaranga y’u Rwanda 1,989 ku litiro, mu gihe mazutu yashyizwe ku mafaranga y’u Rwanda 1,948 ku litiro.
RURA yasobanuye ko ibi biciro bishya byashyizweho hashingiwe ku mpinduka ziri ku isoko mpuzamahanga ry’ibikomoka kuri peteroli, ndetse n’ingamba Leta y’u Rwanda yafashe mu guhangana n’ingaruka z’izamuka ry’ibiciro ku rwego rw’isi.
Uru rwego rwibukije abafite sitasiyo zicuruza ibikomoka kuri peteroli kubahiriza ibiciro ntarengwa byashyizweho, rukaba rwanasabye Abaturarwanda gukomeza gukurikirana amatangazo atangwa ku bijyanye n’imihindagurikire y’ibiciro.
Iri tangazo rije mu gihe ibiciro by’ibikomoka kuri peteroli ku isoko mpuzamahanga bikomeje guhindagurika, bikagira ingaruka ku bihugu bitumiza ibikomoka kuri peteroli hanze, birimo n’u Rwanda.
RURA isaba buri wese gukomeza gukoresha ibikomoka kuri peteroli mu buryo buboneye no kwirinda gusesagura, mu rwego rwo kugabanya ingaruka zishobora guterwa n’izamuka ry’ibiciro ku bukungu bw’igihugu.