Ikipe y’igihugu y’u Rwanda (Amavubi) itsinze ikipe y’igihugu ya Benin ibitego 2-1 mu mukino wa Kane wo gushaka itike y’igikombe cy’ Afurika cya 2025.
Ni umukino wo kwishyura ku mpande zombi wabereye kuri sitade Amahoro nyuma y’umukino wa mbere Benin yari yatsinzemo u Rwanda ibitego 3-0 mu cyumweru gishize.
Amakipe yombi yagiye guhura afite intego zitandukanye, kuko Benin iyo itsinda uyu mukino yari guhita ibona itike bidasubirwaho yo gukina imikino y’igikombe cy’ Afurika naho ikipe y’igihugu y’u Rwanda iyo itsindwa yari guhita isezererwa muri iyi mikino
Umutoza w’ ikipe y’igihugu y’u Rwanda (Amavubi) yatangiranye impinduka mu bakinnyi 11 ba bajemo mu kibuga ugereranyije n’umukino wabaye kuwa Gatanu, kuko yakuyemo Niyomugabo Claude na Kevin Muhire maze akoresha, Manishimwe Emmanuel ndetse na Samuel Guellette.
Umukino watangiye Amavubi akina neza mu buryo bwo guhererekanya ndetse no gushaka ibitego, nko ku munota wa mbere Mugisha Gilbert yahushije uburyo imbere y’izamu asigaye wenyine.
Ikipe y’igihugu ya Benin yacungiraga ku mipira yihuta isatira (contre-attaque) , yabonye amahirwe ku munota wa 42 ku makosa ya myugariro w’Amavubi, Fitina Ombolenga maze Edwin Hountondji acenga abarimo Mugisha Bonheur na Mutsinzi Ange maze atsinda igitego mu buryo bworoshye ndetse n’igice cya mbere kirangira ari igitego 1-0 .
Igice cya kabiri cy’umukino, umutoza Frank Splitter wa Amavubi yakuyemo Kwizera Jojea yunjiza mu kibuga Ruboneka Jean Bosco .
Ikipe y’igihugu y’u Rwanda (Amavubi) yari ifite umwenda w’igitego muri uyu mukino yakomeje kwataka cyane abarimo Emmanuel Manishimwe ndetse na Nshuti Innocent ku munota wa 72 barema uburyo imbere y’izamu ku mupira wari utewe neza na Mutsinzi Ange maze Emmanuel uzwi nka Mangwende ashyira Umupira ku mutwe werekeza mu izamu maze usanga Nshuti Innocent ahagaze neza ahita awerekeza mu rucundura , amakipe yombi ahita ANGANYA 1-1.
Nyuma yo gutsinda iki Gitego hashize umunota umwe (73) , Emmanuel Imanishimwe wagize umukino mwiza yatanze Umupira mwiza imbere y’izamu rya Benin maze usanga Ruboneka Jean Bosco ahagaze neza awushyira ku gatuza awuha Djihad Bizimana agiye gutera ba myugariro ba Benin bamukorera amakosa bityo umusifuzi asifura ikosa rya penaliti.
Iyi penaliti yatewe neza na Kapiteni w’ikipe y’igihugu y’u Rwanda, Bizimana Djihad maze arayinjiza bityo Amavubi akomeza kuyobora umukino n’ibitego 2-1 ndetse n’umukino urangira uko.
Nyuma y’uko u Rwanda rubonye amanota 3, rwahise rukomeza kuba urwa gatatu mu itsinda nyuma na Nigeria ifite amanota 7 hagakurikiraho Benin ifite amanota 6 naho ikipe y’igihugu y’u Rwanda ikagira amanota 5.