Umuyaga mwinshi wibasiye igihugu cy’u Bushinwa watumye ingendo z’indege zihagarikwa mu murwa mukuru Beijing, amashuri arafungwa ndetse n’amamiliyoni y’abantu asabwa kuguma mu ngo zabo.
Bimwe mu bitangazamakuru bya leta biraburira abantu bapima munsi y’ibiro 50 ko bashobora “guturwa n’umuyaga byoroshye,” bityo bagasabwa kutawugendamo.
Ibitangazamakuru bya Leta kandi byatangaje ko kugeza saa munani z’amanywa zo mu Bushinwa, nukuvuga saa kumi n’ebyeri zo mu gitondo ku isaha ngengamasaha ya GMT, ibiti 703 i Beijing byari bimaze kurimburwa n’uyu muyaga, mu gihe indege 693 zari zimaze gusubika ingendo ku bibuga by’indege mpuzamahanga bibiri biri mu murwa mukuru Beijing.
Uyu muyaga witezweho gukaza umurego muri izi mpera z’icyumweru, aho uri kugendera ku muvuduko wa kilometero 150 ku isaha imwe, ndetse ukaba ari wo muyaga ufite uyu muvuduko ubayeho i Beijing mu Bushinwa nibura mu myaka 50 ishize.
Ibikorwa bikurura ba mukerarugendo nabyo byahagaritswe, mu gihe kandi uyu muyaga wigaruriye ibiganiro ku mbuga nkoranyambaga, aho abantu benshi bagaragaje impungenge ku bakozi bagemura ibiryo bakomeje gukora n’ubwo ikirere kimeze nabi.
Umwe mu bakoresha urubuga nkoranyambaga rwa Weibo yanditse ati: “Mu bihe nk’ibi by’ikirere kibi, dushobora kudatumiza ibiryo – birababaje cyane kuri bo.”
Iyi nkubi y’umuyaga kandi yahagaritse isiganwa (half-marathon) ryari riteganyijwe ku Cyumweru, aho ‘robot’ zisa n’abantu zari zigiye guhangana n’abantu mu rwego rwo kwerekana intambwe u Bushinwa bumaze gutera mu ikoranabuhanga.
Byitezwe ko uyu muyaga uzatangira kugenza make mu ijoro ryo ku cyumweru.