U Rwanda rwasinyanye amasezerano n’Impuzamashyirahamwe y’Umukino wa Volleyball muri Afurika yo kwakira Shampiyona Nyafurika y’Amakipe y’Abagabo muri Volleyball ya 2026 (CAVB Men’s Club Championship), irushanwa rihuza amakipe yabaye aya mbere iwayo ku mugabane wa Afurika.
Aya masezerano yasinyiwe mu muhango wabereye muri Kigali Convention Center kuri uyu wa Kane tariki ya 5 Werurwe 2026, hagati y’Ishyirahamwe ry’Umukino wa Volleyball mu Rwanda (FRVB) n’Impuzamashyirahamwe y’Umukino wa Volleyball muri Afurika (CAVB).
Amasezerano yashyizweho umukono na Perezida wa FRVB, Ngarambe Raphael, mu gihe CAVB yari ihagarariwe na Perezida wayo Bouchra Hajij.
Muri uwo muhango hanerekanwe ku mugaragaro ikirango kizifashishwa muri iri rushanwa riteganyijwe kubera mu Rwanda kuva tariki ya 20 Mata kugeza ku wa 3 Gicurasi 2026.
Ni ku nshuro ya mbere iri rushanwa rigiye kubera mu Rwanda, ndetse rikaba n’ubwa mbere rizabera mu gihugu giherereye munsi y’ubutayu bwa Sahara kuva ryatangira gukinwa.
Amakipe azahagararira u Rwanda muri iri rushanwa ni APR Volleyball Club, Police Volleyball Club na Kepler Volleyball Club.
Perezida wa CAVB, Bouchra Hajij, yageze mu Rwanda mu ijoro ryo ku wa Gatatu tariki ya 4 Werurwe 2026 ari kumwe n’umuyobozi wungirije wa CAVB, Rwakiranya Louis, bakirwa na Perezida wa FRVB, Ngarambe Raphael.
Mbere yo gusinya aya masezerano, Bouchra Hajij yanakiriwe na Minisitiri wa Siporo, Nelly Mukazayire, mu biro bye, baganira ku myiteguro y’iri rushanwa ndetse n’uburyo bwo gukomeza guteza imbere umukino wa volleyball mu Rwanda no ku mugabane wa Afurika.
Iri rushanwa ritegerejweho guhuza amakipe akomeye muri volleyball ku mugabane wa Afurika, rikazaba n’umwanya ku Rwanda wo kongera kwigaragaza mu kwakira amarushanwa mpuzamahanga akomeye.
