Umutoza w’umunyabigwi mu mupira w’amaguru, Pep Guardiola w’imyaka 55 y’amavuko, yatangaje ko azava muri Manchester City mu mpera z’uyu mwaka w’imikino, asoza urugendo rw’imyaka 10 rudasanzwe rwahinduye amateka y’umupira w’u Bwongereza n’u Burayi.
Nubwo uyu mugabo ukomoka muri Espagne yari afite amasezerano yagombaga kugeza mu mpeshyi ya 2027, impande zombi zumvikanye gusesa amasezerano ku bwumvikane.
Mu magambo yatambutse ku mbuga nkoranyambaga za Manchester City, Guardiola yashimiye abafana bamwizeye, agira ati: “Ndabashimira ko mwanyizeye, ko mwansunitse, kandi ko mwankunze… byari bishimishije cyane. Ndabakunda mwese.”
Muri iyi myaka 10 (2016–2026), Guardiola yubatse ibigwi bikomeye kuri Etihad Stadium aho yegukanye ibikombe 20 byose hamwe. Muri ibyo harimo ibikombe bitandatu bya Premier League, aho bine muri byo yabitwaye yikurikiranya hagati ya 2021 na 2024, amateka atarakorwa n’undi mutoza mu mupira w’u Bwongereza.
Muri ibi bikombe kandi harimo n’igikombe cya UEFA Champions League cyo mu 2023, bikaba byari ubwa mbere Manchester City yari icyegukanye mu mateka yayo, ndetse n’ibindi bikombe birimo FA Cup, Carabao Cup, UEFA Super Cup, na FIFA Club World Cup.
Muri uyu mwaka we wa nyuma w’imikino, nubwo Manchester City itashoboye kwegukana igikombe cya Premier League, Pep Guardiola asize ahesheje iyi kipe ibikombe bibiri, ari byo Carabao Cup na FA Cup.
Umukino we wa nyuma uteganyijwe kuri Etihad Stadium, ukazaba ari uwa shampiyona iyi kipe izakina na Aston Villa ku Cymweru. Biteganijwe ko abafana n’ubuyobozi aribwo bamusezeraho ku mugaragaro.
Nyuma yo gusoza akazi ko gutoza, ubuyobozi bwa Manchester City bwatangaje ko Pep Guardiola azahita ahabwa akazi gashya k’icyubahiro ko kuba Ambasaderi ku rwego rw’Isi (Global Ambassador) w’ikigo cya City Football Group (CFG) kibarizwami n’iyi kipe yo mu Majyaraguru y’u Bwongereza.
Biteganyijwe ko uyu Mwesipanyoro azasimburwa n’Umutaliyani Enzo Maresca wahoze amwungirije muri iyi kipe mbere yo gutoza Leicester City na Chelsea. Maresca akaba yaramaze no gutangira gukorana n’ubuyobozi bwa Manchester City mu rwego rwo gupanga igenamigambi ry’igihe kiri imbere no gukomeza umurage w’imikinire n’intsinzi Guardiola asize muri iyi kipe.