Perezida Nicolás Maduro wakuwe ku butegetsi bwa Venezuela na Leta Zunze Ubumwe za Amerika, yagejejwe imbere y’urukiko rw’i New York hamwe we n’umugore we aho bombi bahakanye ibyaha baregwa n’iki gihugu.
Muri urwo rukiko i New York, Maduro yahakanye ibyaha bishingiye ku bucuruzi bw’ibiyobyabwenge aregwa, avuga ko arengana mu rubanza rwatangiye ku wa Mbere kandi rukurikiranwa n’abantu benshi ku isi.
Iburanisha ryatangiye Umucamanza Alvin Hellerstein w’imyaka 92 asomera Maduro ibyaha bine aregwa, n’umugore we ibyaha bitatu aregwa.
Umushinjacyaha mukuru wa Amerika Pam Bondi ku wa gatandatu yatangaje ibyo byaha baregeye uru rukiko rwo mu mujyi wa New York birimo umugambi w’iterabwoba n’ibiyobyabwenge, umugambi wo kwinjiza muri Amerika Cocaine no gutanga imbunda za ‘machineguns’ n’ibintu biturika byo kugirira nabi Amerika.
Ahawe umwanya ngo agire icyo avuga ku byo aregwa, Maduro w’imyaka 63 yagize ati: “Ndarengana. Ibyo byaha ndabihakana. Ndi umugabo wiyubashye kandi ndacyari Perezida wa Venezuela”.
Umucamanza yamuciye mu ijambo amubuza gukomeza, ati: “Hari igihe n’ahantu tuzagera kuri ibyo byose”.
Umugore we Flores w’imyaka 69 yabanje gusubiramo amazina ye maze na we ahakana ibyaha bitatu aregwa agira ati: “Ndi ‘first lady’ wa Venezuela…Ndarengana byuzuye”
Umucamanza yasubiyemo uburenganzira bemerewe n’amategeko burimo kunganirwa ndetse no kutagira icyo bavuga mu rubanza rwabo.
Maduro yunganiwe na Barry Pollack, umunyamategeko w’i Washington wigeze kunganira abantu barimo Julian Assange. Naho umugore we yunganiwe na Mark E. Donnelly, umunyamategeko w’i Houston muri leta ya Texas.
Umucamanza yashoje iri buranisha ryamaze iminota 30 gusa, avuga ko bazongera kuburana tariki 17 Werurwe.
Uru rubanza byitezwe ko rushobora kuzamara amezi menshi.
Abantu barimo gusohoka, umwe mu baturage bari bitabiriye iburanisha yateye ijwi hejuru abwira Maduro mu rurimi rw’Icyespanyole ngo “ishyura” ibyo yakoze.
Maduro yamuhindukiriye aramusubiza ati: “Ndi Perezida washimuswe” kandi ko ari “imfungwa y’intambara”, nuko asohorwa mu rukiko n’umugore we inyuma ye.