Umudage w’imyaka 24, Moritz Kretschy, ukinira ikipe ya NSN (Never Say Never) Development Team, ni we wegukanye irushanwa rya Tour du Rwanda ryasojwe kuri iki Cyumweru, nyuma yo kuzenguruka ibilometero 997 na metero 800 byakinwe mu duce umunani twazengurutse igihugu kuva tariki 22 Gashyantare 2026.
Kretschy yegukanye iri siganwa nyuma yo kumara iminsi ine yambaye umwambaro w’umuhondo uhabwa uyoboye urutonde rusange. Yawambariye mu Karere ka Rubavu hasozwa Agace ka Kane, aho yasoreje ku mwanya wa kabiri, awinjirana no mu gace ka nyuma kazengurutse Umujyi wa Kigali.
Ku munsi wa nyuma, yari ayoboye urutonde rusange arusha mugenzi we w’Umudage, Johannes Adamietz, ukinira ikipe ya Rembe | Rad-net, iminota ibiri n’amasegonda umunani. Iki gihe yari afite cyamuhaga icyizere cyo kwegukana iri rushanwa, ndetse niko byaje kugenda.
Nubwo mu Gace ka Munani kangana n’ibilometero 83 na metero 800 yabaye uwa 37 arushijwe amasegonda atatu gusa n’uwabaye uwa mbere, Kretschy yegukanye Tour du Rwanda 2026 muri rusange akoresheje amasaha 23, iminota umunani n’amasegonda 48 mu ntera yose y’ibilometero 997 na metero 800.
Agace ka Munani kegukanywe n’Umunya-Eritrea w’imyaka 26, Henock Mulubrhan, wakoresheje isaha imwe, iminota 59 n’amasegonda 37. Uyu mukinnyi yanegukanye n’igihembo cy’Umukinnyi mwiza w’Umunyafurika muri iri rushanwa.
Mu bakinnyi b’Abanyarwanda bitwaye neza muri aka gace ka nyuma, Muhoza Eric yabaye uwa karindwi, arushijwe amasegonda atatu gusa n’uwabaye uwa mbere.
Ku rutonde rusange, umwanya wa kabiri wegukanywe na Johannes Adamietz wakoresheje amasaha 23, iminota 10 n’amasegonda 56, arushijwe na Kretschy iminota ibiri n’amasegonda umunani. Umwanya wa gatatu watwawe n’Umubiligi Duarte Marvoete, ukinira ikipe ya Lotto Development Team, warushijwe iminota ibiri n’amasegonda 32, mu gihe uwa kane wabaye Desta Amaniel warushijwe iminota itanu n’amasegonda 13.
Mu Banyarwanda, uwaje hafi ku rutonde rusange yabaye Niyonkuru Samuel ukinira ikipe ya Amani Cycling Team, wabaye uwa 16 akoresheje amasaha 23, iminota 14 n’amasegonda 39, arushijwe na Kretschy iminota itanu n’amasegonda 51.
