Ishuri ‘Ahazaza Independent School’ riherereye mu Karere ka Muhanga ririshimira umusaruro waryo mu mwaka w’amashuri 2024-2025, by’umwihariko muri Progaramu mpuzamahanga ya Cambridge.
Ibirori byo kwishimira umusaruro w’iri shuri no gusoza umwaka w’amashuri wa 2024-2025 byabereye ku cyicaro cy’iri shuri, mu Mujyi wa Muhanga, byitabirwa n’abarimo Gilbert Mugabo, Umuyobozi wungirije w’Akarere ka Muhanga ushizwe imibereho y’abaturage, abagize umuryango Ahazaza, ababyeyi baharerera n’abanyeshuri bahiga.
Ni ibirori byaranzwe n’imyiyereko inyuranye y’abanyeshuri mu byiciro byose aho baririmbye, babyina mu buryo bugezweho n’ubwa Kinyarwanda, bagaragaza imideli, imikino njyarugamba n’ibindi.
N’ubwo muri uyu mwaka ari bwo iri shuri ryabuze uwarishinze, Raina Luff, ntibyatumye rigwa kuko ryashikamye ku buryo umusaruro w’iri shuri mu gihembwe cya mbere wari ku kigero cya 94%, mu gihembwe cya kabiri rigira 95%, mu gihe mu gihembwe cya gatatu ryagize 96%.
Ku musaruro w’iri shuri muri programu mpuzamahanga ya Cambridge, iri shuri ryagize 36 kuri 50 mu isomo ry’Icyongereza, 41 kuri 50 mu Mibare na 37 kuri 50 muri Siyansi.
Umuyobozi wungirije w’Akarere ka Muhanga yavuze ko umusaruro w’iri shuri ari uwo gushimwa ndetse yongeraho ko iri shuri rimaze kuba igicumbi cy’ubumenyi.
Ati “Ahazaza si ishuri gusa, ahubwo ni igicumbi cy’ubumenyi bigendanye n’abana bagiye bava hano, n’izina ishuri rimaze kugira. Ahazaza ni umuryango mugari utanga ubumenyi n’uburere bifatika kandi bifite ishingiro.”
Ashingiye kuri ibi, Bwana Mugabo yaboneyeho gusaba buri wese gukomeza gutanga umusanzu we kugira ngo iri shuri rigere ku ntego zaryo.
Ati “Nk’uko babyifuza ko nibura uyu mwaka bazaza mu myanya itatu ya mbere ku rwego rw’igihugu, dukeneye gufasha iri shuri kugira ngo intego zabo bazigereho.”
Mu izina ry’Umuryango Ahazaza, Me. Aloys Hakizimana, Umuyobozi wungirije wa Ahazaza NGO yashimangiye ko nubwo umwaka 2024-2025 utaboroheye ariko bagerageje kuwutambukamo gitwari.
Ati “Gusimbura Raina si ikintu cyoroshye. Hari aho byageze natwe twibaza niba tuzabasha gukomeza umurage we. Icyakora byarakunze ndetse n’umwaka uba uw’umusaruro mwiza nk’uko mwabibonye. »
Ababyeyi barerera muri iri shuri nabo bavuga ko ari ishuri ry’icyitegererezo mu yandi mashuri, bishimangira umuhate n’umurava w’abayobozi n’abarimu b’iri shuri.
Charles Ngamije ufite abana babiri biga muri iri shuri, umwe mu wa gatanu undi mu wa gatatu, avuga ko yahisemo iri shuri kuko ari ahantu hake hari porogaramu zirenze imwe.
Ati « Ni ahantu hake wasanga programu ya leta, Cambridge na DELF. Uretse kuba bifashwa umwana kubona ubumenyi butandukanye binatuma agira amahitamo anyuranye. »
Ngamije yongeraho ko abana biga muri iri shuri bahabwa ibirenze amasomo. Ati «Icya mbere baratsinda neza, ndetse baratinyuka kuko isi turimo ni ukugira ubumenyi no gutinyuka kubukoresha. »
Kendra Sarah nawe ufite abana babiri muri iri shuri avuga ko iri shuri rikwiye gukomereza aho rigeze kuko ngo ritanga n’ibyo ababyeyi baba batiteze.
Ati «Iri shuri rikurikirana umwana umwe ku wundi, bagera kuri buri mwana bakagerageza ibishoboka byose ku buryo umwana adasigara inyuma. Barashoboye, n’ibyo tudatekereza ko bakorera abana, barabibakorera. Ibyo nakabaye nifuza barabitanga ahubwo bakomeze ibirenze. »
Ishuri ‘Ahazaza Inependent School’ ryashinzwe mu mwaka wa 2006, rishinzwe na Raina Luff.
