Kenya yaje ku mwanya wa mbere ku isi mu bijyanye no kugira abaturage bamara amasaha menshi ku mbuga nkoranyambaga.
Ni ibigaragazwa na raporo nshya ya ‘Digital 2024’, ikorwa ku bufatanye na Visual Capitalist.
Nk’uko iyi raporo ibigaragaza, Abanya-Kenya bamara impuzandengo y’amasaha 3 n’iminota 43 ku mbuga nkoranyambaga buri munsi.
Aya masaha bayakoresha ku mbuga nkoranyambaga zonyine hatabariwemo ayo bashobora gukoresha bakora ibindi bikorwa byifashisha murandasi ‘internet’.
Iyi mibare yashingiwe ku bakoresha internet bafite hagati y’imyaka 16 na 64.
Ku mpuzandengo, umuntu ukoresha imbuga nkoranyambaga mu buryo busanzwe azimaraho hafi amasaha 2 n’iminota 30 buri munsi, ibingana na kimwe cya gatatu cy’igihe cyose amara kuri internet.
Raporo yerekana ko Kenya iza imbere ya Afurika y’Epfo na Brazil mu gukoresha imbuga nkoranyambaga. Ibi ngo biterwa n’uko Abanya-Kenya bafite umubare munini w’abakoresha internet bangana na 40.8% by’abaturage bose hashingiwe ku mibare yo mu ntangiriro za 2024.
Afurika y’Epfo yaje ku mwanya wa kabiri, aho Abanyafurika y’Epfo bamara impuzandengo y’amasaha 3 n’iminota 37 ku mbuga nkoranyambaga, hagakurikiraho Brazil n’amasaha 3 n’iminota 34, Philippines n’amasaha 3 n’iminota 33, naho Nigeria ikaza ku mwanya wa gatanu n’impuzandengo y’amasaha 3 n’iminota 23.
Ghana na Misiri na byo byagaragaye mu bihugu makumyabiri bya mbere ku myanya ya 13 na 14, aho abaturage b’ibi bihugu bamara impuzandengo y’amasaha 2 n’iminota 43 na 2 n’iminota 41 buri munsi.
Iyi raporo kandi igaragaza ko abagore aribo bamara igihe kinini ku mbuga nkoranyambaga ugereranyije n’abagabo kuko abagore baza imbere ho iminota 16.
Mu mbuga nkoranyambaga zose, TikTok niyo imarwaho igihe kinini ku mpuzandengo ya buri buri wese.
Ku rundi ruhande, YouTube ifite umwanya runini mu masaha yose abakoresha internet bamara ku mbuga nkoranyambaga zose hamwe.
U Buyapani nibwo buza ku mwanya w’inyuma mu bihugu aho abaturage bamara igihe gito ku mbuga nkoranyambaga, aho impuzandengo ari isaha imwe n’iminota 53 buri munsi.
Mu isi yose, imibare igaragaza ko abantu miliyari 5 bakoresha imbuga nkoranyambaga.