Umubare w’abahitanwe n’imyuzure n’inkangu byibasiye Nepal n’agace ka Tibet mu Bushinwa wamaze kurenga 1,000, mu gihe abarenga 4,400 bakomeje kuburirwa irengero, nyuma y’ibiza bikomeye byatangiye ku wa 26 Kanama 2026 mu misozi ya Himalaya.
Imibare mishya yatangajwe kuri uyu wa 1 Nzeri 2026, inzego zishinzwe guhangana n’ibiza muri Nepal zatangaje ko 987 bamaze kwemezwa ko bapfuye, mu gihe 3,916 baburiwe irengero.
Ku rundi ruhande rw’umupaka, mu gace ka Tibet kari mu Bushinwa, hamaze kwemezwa ko 16 bapfuye, abandi 546 bakaba baburiwe irengero.
Ibi bivuze ko hamaze kwemezwa urupfu rw’abantu nibura 1,003, mu gihe abantu barenga 4,400 bataramenyekana irengero ryabo. Inzego z’ubutabazi zatangaje ko zikomeje gushakisha abantu mu byondo, amabuye n’ibindi byangijwe n’ibi biza, bityo imibare ikaba ishobora kongera guhinduka.
Ibi biza byatangiye ku wa 26 Kanama, nyuma y’uko habaye gusenyuka kw’igice cy’urubura rwo mu misozi ya Himalaya.
Mu duce twinshi twibasiwe, ibikorwa by’ubutabazi biracyagoranye kuhagera bitewe nuko imihanda n’ibiraro byangiritse, ndetse n’imiterere igoye y’imisozi ndetse n’amazi akomeje gutemba mu bice bimwe.