Ku wa Gatanu, tariki ya 25 Nzeri 2026, Ishuri Rikuru Gatolika rya Kabgayi (ICK), ryakiriye abanyeshuri bashya baje gutangira umwaka w’amashuri wa 2026–2027.
Aba banyeshuri baziga mu mpera icyumweru, ibizwi nka ‘Weekend Program’, harimo abaziga ikiciro cya Kabiri cya kaminuza(A0) mu mashami anyuranye, ndetse nabaje gutangira Ikiciro cya Gatatu cya Kaminuza (Masters’).
Bakiriwe n’abakozi bashinzwe serivisi z’abanyeshuri muri ICK, ndetse n’abanyeshuri bahagarariye abandi (AGE ICK).
Bamwe muri abo banyeshuri baganiriye na ICK News, bavuze ko bahisemo kuza kwiga Ishuri rikuru Gatolika rya Kabgayi kuko bazi ko ritanga uburezi bufite ireme kandi butuma urirangijemo aba yujuje ibikenewe ku isoko ry’umurimo.
Ndayishimiye Chaste waje kwiga Ikiciro cya Gatatu cya Kaminuza mu ishami ry’uburezi, yagize ati: “Iyo ndebye bamwe mu barezi beza dufite uyumunsi nsanga barize muri ICK, kandi niyo ukoze ubushakashatsi ukanaganira nabahize usanga barahakuye ubumenyi buhagije, bityo niyo mpamvu nanjye nifuje kuza hano.”
Uwamurera Ishimwe Evelyne waje kwiga Ikiciro cya kabiri mu gashami k’Iterambere ry’Imijyi n’Icyaro, avuga ko yahisemo ICK kuko ari ishuri ryiza kandi rinamwegereye.
Ati “Haranyegereye pe kandi nishimiye ukuntu abanyeshuri bahiga barangwa n’ikinyabupfura bakagira ubumenyi bukenewe ku isoko ry’umurimo, niyo mpamvu nanjye nifuje kuhaza rwose kandi nizeye ko nzabihabona byose.”
Umuyobozi ushinzwe serivisi z’abanyeshuri muri ICK, Uwineza Jeanne, yavuze ko bishimiye kwakira abanyeshuri bashya. Yabasabye kuzarangwa n’ikinyabupfura mu masomo yabo, kandi kikabaranga baba bari muri ICK cg hanze yayo.
Banasabwe kandi kubaha amabwiriza y’ishuri bajemo kuko ari rya gikirisitu bityo ko bagomba kubahirizwa amabwiriza yaryo arimo no kwambara bakikwiza.
Usibye ibyo kandi, abanyeshuri bashya basobanuriwe ko ICK yashyize imbaraga mu myidagaduro n’imikino, harimo siporo, imbyino gakondo n’ibindi bikorwa bitandukanye bigamije guteza imbere impano n’imibanire by’abanyeshuri.
Twagirayezu Marcellin ushinzwe serivisi zo kwandika abanyeshuri, nawe yagaragaje uburyo Ishuri ryishimiye kubona abanyeshuri baje bagana umuryango mugari wa ICK.
Yabasobanuriye ko amabwiriza yose babwiwe agamije kubafasha kwiga neza kugira ngo bazabashe kugera ku ntego zabo neza. Yabashishikarije no gukora imikoro yose abarimu bazabaha kuko ariyo iba igamije kubafasha gukarishya ubumenyi bwabo ndetse bikanajyana no gukora ibizamini byose neza.
Yanabasabye kandi kwirinda ibirangaza byose bishobora gutuma batezuka ku ntego zabo.
Biteganyijwe ko abanyeshuri bashya babanza guhabwa ikizamini cy’ururimi rw’Icyongereza kigamije kureba urwego bariho muri urwo rurimi cyane ko arirwo rwigishwamo. Nyuma yacyo nibwo batangira amasomo yabo.
