Ku Cyumweru, tariki ya 16 Kanama 2026, muri Hotel Splendid Muhanga, habereye igitaramo cyiswe “Summer Harmony Concert”, cyateguwe na Chorale Saint Pierre Gitarama mu rwego rwo gususurutsa abakunzi bayo no gukomeza ubutumwa bw’ivugabutumwa binyuze mu ndirimbo.
Iki gitaramo cyitabiriwe na Nyiricyubahiro Musenyeri Balthazar Ntivuguruzwa, Umwepiskopi wa Diyosezi ya Kabgayi; Mugabo Gilbert, Umuyobozi w’Akarere ka Muhanga wungirije ushinzwe imibereho myiza y’abaturage; abapadiri n’abihayimana, abayobozi mu nzego zitandukanye, abakunzi n’abaterankunga ba Chorale Saint Pierre, ndetse n’abandi bakunzi b’umuziki.
Abitabiriye igitaramo basusurukijwe n’indirimbo n’injyana zitandukanye, zirimo ‘classical music’, indirimbo z’umuco, izihimbaza Imana, karahanyuze n’izindi njyana zitandukanye.
Iki gitaramo cyari gifite umwihariko kuko cyahuriranye no kwizihiza imyaka 40 Chorale Saint Pierre Gitarama imaze ikora ubutumwa muri Paruwasi ya Mutagatifu Andereya i Gitarama, kuva yashinzwe mu mwaka wa 1986.
Mu butumwa yagejeje ku bitabiriye igitaramo, Musenyeri Balthazar Ntivuguruzwa yashimiye Chorale Saint Pierre ku myaka 40 imaze ikoresha impano z’abaririmbyi bayo mu gusingiza Imana no kugeza ubutumwa ku bantu.
Ati: “Ibyishimo mwatanze uyu munsi ni imbuto z’imyaka 40 mumaze mukoresha impano zanyu mu gusingiza Imana no mu ivugabutumwa.”
Umwepiskopi kandi yavuze ko Chorale Saint Pierre yafunguriye amarembo izindi korari zo muri Diyosezi ya Kabgayi, zibona amahirwe yo gutegura ibitaramo no gusangiza abantu impano zazo.
Yifurije Chorale Saint Pierre isabukuru nziza, ayishimira intambwe imaze gutera, anayisaba gukomeza gukoresha impano zayo mu gutanga ubutumwa no guhesha abantu ibyishimo.
Ati: “Ntimugahagararire aha. Mukomeze gukoresha impano mufite, kugira ngo n’ubutaha muzongere muhe abantu ibyishimo n’ubutumwa nk’ibyo mwabahaye uyu munsi.”
Musenyeri Balthazar yakomeje avuga ko ibitaramo nk’ibi bifite akamaro mu mibereho y’abaturage, kuko bibaha umwanya wo kuruhuka no gusabana, ariko bikabafasha no gukomeza kugira icyizere.
Ati: “Abantu bakeneye ahantu ho kuruhukira, bakumva indirimbo zibahumuriza, bakibutswa ko Imana ikibakunda kandi ko ubuzima bugifite icyanga.”
Ibi byashimangiwe n’Umuyobozi w’Akarere ka Muhanga wungirije ushinzwe imibereho myiza y’abaturage, Mugabo Gilbert, washimiye Chorale Saint Pierre ku gikorwa yateguye.
Mugabo yavuze ko ibitaramo bigira uruhare mu mibereho myiza y’abaturage, kuko bibaha umwanya wo kwidagadura no gusangira ibyishimo, mu gihe indirimbo zifite ubutumwa zikomeza kubaka imitima.
Ati: “Ibitaramo nk’ibi ni ingenzi kuko biha abantu umwanya wo kwidagadura, kuruhuka no gusangira ibyishimo, ariko kandi bikanabafasha gusingiza Imana binyuze mu ndirimbo.”
“Summer Harmony Concert” ni kimwe mu bikorwa bigaragaza urwego Chorale Saint Pierre Gitarama imaze kugeraho mu bijyanye n’umuziki n’imiririmbire, ndetse kikaba kimwe mu bikorwa by’umwihariko iyi korari yateguye mu rwego rwo kwizihiza imyaka 40 imaze ikora ubutumwa.