Ku Cyumweru tariki ya 24 Gicurasi 2026, Ishuri ryisumbuye rya Ecole Sainte Bernadette de Kamonyi, ryahimbaje Umunsi Mukuru wa Mutagatifu Bernadette umurinzi w’iri shuri, abanyeshuri basabwa gutera ikirenge mucye.
Ibi birori byahuriranye n’umunsi mukuru wa Penekositi, byabimburiwe n’Igitambo cya Misa cyatuwe n’Igisonga cy’Umwepiskopi wa Diyosezi ya Kabgayi, Musenyeri Hodari Jean de Dieu no gutaha ku mugaragaro ibyumba by’amashuri 24 byubatswe ku buryo bugezweho.
Byitabiriwe kandi n’abayobozi batandukanye barimo Umuyobozi w’Akarere ka Kamonyi wungirije Ushinzwe Ubukungu n’Iterambere Niyongira Uzziel, uhagarariye Polisi, Abasaseridoti n’Abihayimana, abarezi, abanyeshuri ndetse n’ababyeyi.
Mu butumwa bwatanzwe n’Igisonga cy’Umwepiskopi Hodari Jean de Dieu, wari uhagarariye umwepiskopi wa Diyosezi ya Kabgayi muri ibi birori, yasabye abiga mu ishuri rya Ste Bernadette de Kamonyi gukurikiza urugero rwa Mutagatifu Bernadette, bagaharanira kugira imyitwarire myiza no kubaha amasomo yabo.
Yagize ati: “Mutagatifu Bernadette ni urugero rwiza rw’umwana wubashye Imana kugeza gupfa. Yaranzwe kandi no kwicisha bugufi n’urukundo. Namwe rero nimwigire kuri we, muhore mushyira imbere imyitwarire myiza, gukunda amasomo no gukora ibibateza imbere.”
Musenyeri Hodari Jean de Dieu, Igisonga cy’Umwepiskopi wa Diyosezi ya Kabgayi
Yakomeje asaba abanyeshuri kugira uruhare mu kubaka ejo habo heza binyuze mu kwirinda ingeso mbi no guharanira kuba intangarugero aho bari.
Ati: “Uburezi mufata hano bugomba kujyana n’ubupfura n’ubunyangamugayo. Ntimukwiye kwita gusa ku manota, ahubwo mukwiye no kwiyubaka mu mico n’indangagaciro zibafasha kuzavamo abantu b’ingirakamaro mu gihugu cyanyu.”
Abanyeshuri bagaragaje ko bakiriye neza ubutumwa bahawe
Umunyeshuri uhagarariye abandi, Kwizera Mutaganda Joshua, yavuze ko hari byinshi bungutse birimo kuba intangarugero mu byiza, kwirinda ingeso mbi no guharanira gutsinda neza “amasomo yacu.”
Yagize ati: “Iyi nyigisho idusigiye isomo rikomeye ryo kwitwara neza, kubaha abarimu no gushyira umwete mu masomo yacu kugira ngo tuzavemo abantu beza b’ejo hazaza.”
Muyiramye Winny Marvella, wiga mu mwaka wa Gatandatu, MCE, nawe yagize ati: “Nk’abakobwa biga muri Ecole Sainte Bernadette de Kamonyi, Mutagatifu Bernadette atubera urugero rwiza rw’ubupfura, kwicisha bugufi n’ukwemera Imana.”
Yongeyeho ati: “ Ibyo natwe biduha imbaraga zo gukurikiza inzira ye, tukagira imyitwarire myiza, tukaba abakobwa bazira inenge, ndetse tukazavamo ababyeyi bizihiye Imana kandi b’inyangamugayo mu gihe kizaza.”
Ecole Ste Bernadette de Kamonyi ni ishuri rya Diyosezi ya Kabgayi ryashinzwe mu mwaka wa 1968. Ryatangiye ari Iseminari y’abakuze bitegura kwinjira mu iseminari nkuru. Mu mwaka wa 1982 rihindura icyerekezo noneho ryakira abakobwa gusa bigaga imyaka ibiri bitegura kwiyegurira Imana, mu mwaka wa 2009 niho ryatangiye kwakira abana b’abahungu n’abakobwa.
Kuri ubu rifite abanyeshurui 1777, abakobwa 1003 mugihe abahungu ari 774. Biga ikiciro rusange n’ikiciro cya kabiri cy’amashuri yisumbuye, mu mashami y’Imibare, Ubumenyi bw’Ikoranabuhanga n’Ubukungu (MCE), Imibare, Ubukungu n’Ubumenyi bw’Isi) (MEG), n’Amateka, Ubumenyi bw’Isi n’Ubuvanganzo bw’Icyongereza (HGL).
Hari kandi Stream y’Imibare na Siyansi (Mathematics and Science Stream 2)mu mwaka wa Kane na Stream y’Ubugeni n’Ubumenyamuntu (Arts and Humanities Stream 1)
Muri ibi birori hanatashywe ibyumba by’amashuri bishya 24
Mu Gitambo cya Misa yabimburiye ibirori, abanyeshuri 40 biteguye baherewemo Amasakramentu y’ibanze