Urukiko rwo muri Washington, D.C., rwategetse ubutegetsi bwa Perezida Donald Trump gusubiza abanyamakuru b’ibitangazamakuru CNN, Politico na MS NOW uburenganzira bwo kugera muri White House, nyuma y’uko bari babujijwe kuhagera.
Umucamanza Timothy Kelly wo mu Rukiko rw’Intara ya Columbia yatanze itegeko ry’agateganyo risaba ko abo banyamakuru basubizwa impushya zabo zo kwinjira muri White House mu gihe cy’iminsi 14, mu gihe urubanza rugikomeje.
Kelly yavuze ko hari amahirwe menshi y’uko ibyo bitangazamakuru bizagaragaza ko ubutegetsi bwa Trump butakurikije inzira z’amategeko zikwiye mbere yo kubambura uburenganzira bwo kugera ku ngoro y’umukuru w’igihugu.
Umucamanza Kelly kandi yavuze ko ubutegetsi bwa Trump butagaragaje ibimenyetso bifatika bihagije byerekana ko kubuza abo banyamakuru kugera muri White House byari ngombwa mu rwego rwo kurinda umutekano w’igihugu.
CNN, Politico na MS NOW byajyanye ubutegetsi bwa Trump mu nkiko nyuma y’uko abanyamakuru babyo bambuwe impushya zo kwinjira muri White House ndetse bakabuzwa kuhagera.
Ibyo bitangazamakuru byavuze ko icyemezo cyo kubibuza kugera muri White House cyafashwe mu buryo butubahirije uburenganzira bwabyo.
Ubutegetsi bwa Trump bwo bwabwiye urukiko ko bwafashe icyo cyemezo kubera ko ibyo bitangazamakuru byari byatangaje amakuru butemeranywaho na bwo, ndetse ko ibyo byashoboraga kugira ingaruka ku mutekano w’igihugu.
Icyakora, nubwo urukiko rwategetse ko abanyamakuru bibyo binyamakuru uko ari bitatu bakongera gutara amakuru bari muri white House, siko bimeze kuko ukorere Politico yangiwe kwinjira kuri uyu wa Kane. Amakuru avuga kandi ko n’abanyamakuru ba CNN na MS NOW nabo bagerageje kwinjira muri White House ariko barangirwa.
Kugeza ubu, White House ntiratangaza icyo ivuga ku cyemezo cy’umucamanza. Abanyamategeko bahagarariye Perezida Trump bashobora kujuririra iki cyemezo cyangwa bagafata izindi ntambwe mu rwego rw’amategeko.
Uru rubanza rwongeye kugaragaza impaka zirebana n’imibanire hagati ya Trump n’ibitangazamakuru, cyane cyane ku burenganzira bw’abanyamakuru bwo kugera ku bikorwa bya Perezida no gukurikirana imikorere ya guverinoma.
Yanditswe na Umutesi Josiane