Abakinnyi b’ikipe y’igihugu y’u Rwanda mu gusiganwa ku magare Niyonkuru Samuel na Irakoze Ineza Violette bongeye kwegukana Irushanwa ‘Umusambi Race’ ku nshuro ya kabiri yikurikirana.
Ni irushanwa ryabaye kuri iki cyumweru tariki 01 Nzeri 2024, ribera mu Karere ka Gicumbi na Burera rigamije ku bugungabunga Inyoni ndetse n’Imisambi.
Iri siganwa ryakinwe mu byiciro bitatu bitandukanye ari byo; ababigize umwuga; abatarabigize umwuga n’urubyiruko.
Mucyiciro cy’ababigize umwuga, abagore n’abagabo bose basiganwe ku ntera y’ibilometero 89,1, kuko batangiriye Butaro berekeza Miyove baca Ibanda bagaruka i Butaro.
Mu bagabo, Niyonkuru Samuel yabaye uwa mbere akoresheje amasaha atatu, iminota itandatu n’amasegonda 25 mu gihe mu bagore ryegukanwe na Irakoze Neza Violette.
Mu cyiciro cy’abatarabigize umwuga, basiganwe intera y’ibirometero 46 kuko bahagurukiye i Banda berekeza Butaro.
Muri iki cyiciro, Ruberwa Jean Damascene niwe wabaye uwa mbere mu bagabo aho yakoresheje isaha imwe, iminota 25 n’amasegonda 55 mu gihe mu bagore ryegukanwe na Ingabire Domina wakoresheje isaha imwe, iminota 51 n’amasegonda 58.
Mu cyiciro cy’urubyiruko, hasiganwe intera y’ibirometero 37 kuko bahagurukiye Ruhunde berekeza Butaro.
Mu bagabo, uwitwa Mufiteyezu Emmanuel yaritwaye akoresheje isaha imwe, iminota 6 n’amasegonda 54 mu gihe mu bagore Akimana Donatha yaryegukanye akoresheje isaha imwe, iminota 39 n’amasegonda 26. Muri iki cyiciro kandi, abasiganwa bakoresheje amagare asanzwe azwi ku izina rya matabaro ‘pneu ballon’.
Ni ku nshuro ya kabiri iri siganwa rikinwa kuko ryatangiye muri 2023. Ni rimwe mu masiganwa ategurwa na FERWACY hagamijwe kandi kurushaho gukarishya abakinnyi b’Abanyarwanda bitegura kuzitabira shampiyona y’Isi izabera mu Rwanda muri Nzeri 2025.
