Kuri iki Cyumweru, tariki 1 Nzeri 2024 muri Petit Stade Remera, Patriots na APR BBC zongereye amahirwe yo gukina imikino ya nyuma ya kamarampaka nyuma yo gutsinda imikino yazo ya kabiri.
Aya makipe yongereye amahirwe nyuma yo kwitwara neza mu mikino ya ½ ya BetPawa Playoffs.
Ku isaha ya saa kumi n’imwe nibwo umukino wahuzaga Patriots BBC na Kepler BBC watangiye, umukino umukino Patriots yitwaye neza kuko yatsinze Kepler amanota 107 kuri 68.
Iyi ntsinzi yagizwemo uruhare na Perry William watsinze amanota 22.
Nyuma yo kuba Patriots imaze gutsinda imikino ibiri, irasabwa gutsinda umikino wa gatatu kugira ngo ibone itike yo gukina imikino ya nyuma ya kamarampaka.
Umukino wa Patriots na Kepler wakurikiwe n’undi wahuje APR BBC na REG BBC. Ni umukino wagaragayemo agashya kuko umuriro wabuze inshuro eshatu zose.
Uyu mukino waranzwe n’imbaraga nyinshi ku makipe yombi, warangiye APR BBC itsinze REG BBC amanota 65 kuri 60.
Iyi ntsinzi APR yayifashijwemo n’abarimo Isaiah Miller, Williams n’abandi.
Biteganijwe ko imikino ya gatatu ya kamarampaka muri 1/2 izaba ku wa Gatatu, tariki 04 Nzeri 2024, ibere muri BK Arena.