Imyotsi ikomeye yaturutse ku nkongi z’umuriro zibasiye amashyamba mu gace ka Kalimantan muri Indonesia yakwirakwiriye mu bihugu bituranye, igera no muri Manila mu gihugu cya Philippines ndetse na Malaysia.
Ibi byateje impungege ku buzima bw’abaturage kuberaubuziranenge bw’umwuka muri utu duce bwageze ku rwego rwo hasi bitewe n’uko umwuka wanduye cyane.
Ikigo gishinzwe ibidukikije n’umutungo kamere muri Philippines cyatangaje ko habonetse ubwiyongere bw’uduce duto tw’imyanda ihumanya ikirere, tuzwi nka PM2.5, dushobora gutera indwara z’ubuhumekero n’iz’umutima.
Abahanga mu bya siyansi bavuga ko amashusho yafashwe n’icyogajuru agaragaza inkongi z’umuriro muri Kalimantan, ndetse n’umuyaga uva mu majyepfo y’iburengerazuba bwayo, ari byo byatumye uyu mwotsi ukwirakwira uva muri Indonesia ugera muri Philippines.
Abaturage basabwe kwambara udupfukamunwa, cyane cyane two mu bwoko bwa N95,no kugabanya ibikorwa bikorerwa hanze.
By’umwihariko abana, abasaza n’abafite indwara z’ubuhumekero basabwe kwitwararika cyane kubera ingaruka z’uyu mwuka wanduye.
Yanditswe na Umutesi Josiane