Papa Leo wa XIV yohereje ubutumwa mu nama rusange ya 20 y’Ihuriro ry’Inama z’Abepiskopi bo muri Afurika no muri Madagascar (SECAM), asabira ko ibiganiro byabo ku nsanganyamatsiko igira iti: “Kristu, Inkomoko y’Ibyiringiro, Ubumwe n’Amahoro” byagaragaza “akamaro ko guteza imbere uburambe bukomeye bw’urukundo rw’Imana, butuma imitima y’abantu ishibukamo ibyiringiro nyakuri by’agakiza tubonera muri Kristu…”
Papa Leo wa XIV yagaragaje mu butumwa yageneye Perezida wa SECAM, Kardinali Fridolin Ambongo Besungu, Arikiyepiskopi wa Kinshasa, n’abitabiriye inama rusange ya 20 y’Inama z’Abepiskopi bo muri Afurika no muri Madagascar (SECAM), iri kubera i Kigali mu Rwanda kuva ku ya 30 Nyakanga kugeza ku ya 4 Kanama, ku nsanganyamatsiko igira iti: “Kristu, Inkomoko y’Ibyiringiro, Ubumwe n’Amahoro,” ko Isi yizeye Kiliziya zo muri Afurika gukomeza kuba ibimenyetso bifatika by’ibyiringiro ku bantu bose.
Ubu butumwa bwa telegram bwanditswe mu Cyongereza burimo “indamutso y’akanyamuneza” ya Papa, bwoherejwe na Papa binyuze kuri Kardinali Pietro Parolin, Umunyamabanga wa Leta ya Vatikani.
Muri ubwo butumwa, byagaragajwe ko Papa Leo “asabira ko ibiganiro byanyu ku nsanganyamatsiko igira iti: ‘Kristu, Inkomoko y’Ibyiringiro, Ubumwe n’Amahoro’ byagaragaza akamaro ko guteza imbere uburambe bukomeye bw’urukundo rw’Imana, butuma imitima ishibukamo ibyiringiro bidashidikanywaho by’agakiza tubonera muri Kristu, bubashishikariza kandi guteza imbere ubumwe, cyane cyane mu bice imibereho y’abantu yacitsemo ibice n’amakimbirane.”
Ubutumwa bwa Papa bukomeza bugira buti: “Iyi ni yo nzira ko Kiliziya zanyu zo mu turere zizakomeza kuba ibimenyetso bifatika by’ibyiringiro ku bantu bose.”
Ubutumwa bw’Umushumba wa Kiliziya Gatolika bwasozwaga n’uko ashyikiriza imigambi yabo y’igihe kizaza ku busabane bwa Bikiramariya, Umubyeyi w’Ibyiringiro, kandi ababwira ko “abaha umugisha we w’intumwa n’umutima wuje urukundo, nk’ikimenyetso cy’ubusabane dufitanye muri Nyagasani.”
