Ikigo cy’Igihugu gishinzwe Ibarurishamibare mu Rwanda (NISR) cyatangaje ko muri Mutarama 2026 ibiciro ku masoko byazamutseho 7,5% ugereranyije na Mutarama 2025.
Mu byagize uruhare muri iri zamuka ry’ibiciro harimo ibiribwa n’ibinyobwa bidasembuye byazamutseho 5,3%, ibinyobwa bisembuye n’itabi byazamutseho 14,9%, amazu, amazi, amashanyarazi, gazi n’ibindi bicanwa byazamutseho 5,9%, ndetse n’amafunguro n’icumbi byazamutseho 18,2%.
Ugereranyije Mutarama 2026 n’Ukuboza 2025, ibiciro muri rusange byazamutseho 0,6%. Iri zamuka ryatewe ahanini n’ibiciro by’amafunguro n’icumbi byazamutseho 4,1%.
Ibiciro mu mijyi
NISR igaragaza ko mu mijyi, muri Mutarama 2026, ibiciro byazamutseho 8,9% ugereranyije na Mutarama 2025, mu gihe mu Ukuboza 2025 byari byazamutseho 8%.
Iri zamuka ryatewe ahanini n’ibiciro by’ibiribwa n’ibinyobwa bidasembuye byazamutseho 5,3%, ibinyobwa bisembuye n’itabi byazamutseho 15,6%, amazu, amazi, amashanyarazi, gazi n’ibindi bicanwa byazamutseho 10,5%, ndetse n’ibijyanye n’ubuvuzi byazamutseho 71,1%.
Nanone kandi, ibiciro by’ubwikorezi byazamutseho 8,6% naho iby’amafunguro n’icumbi bizamukaho 19,2%.
Ugereranyije Mutarama 2026 n’Ukuboza 2025, ibiciro mu mijyi byazamutseho 1,3%. Iri zamuka ryatewe ahanini n’ibiciro by’ibiribwa n’ibinyobwa bidasembuye byazamutseho 1,5%, iby’amazu n’ibindi bijyanye nabyo byazamutseho 2%, ndetse n’ibiciro by’amafunguro n’icumbi byazamutseho 5%.
Iyo ugereranyije Mutarama 2026 na Mutarama 2025, ibiciro by’ibintu bitarimo ibiribwa n’ibikomoka ku ngufu byazamutseho 8,9%.
Ibiciro mu byaro
Mu byaro, muri Mutarama 2026, ibiciro byazamutseho 6,5% ugereranyije na Mutarama 2025. Mu Ukuboza 2025, byari byazamutseho 3,3%.
Mu byatumye iri zamuka ribaho harimo ibiciro by’ibiribwa n’ibinyobwa bidasembuye byazamutseho 5,3%, ibinyobwa bisembuye n’itabi byazamutseho 14,6%, ndetse n’amafunguro n’icumbi byazamutseho 16,9%.
Ugereranyije Mutarama 2026 n’Ukuboza 2025, ibiciro mu byaro byazamutseho 0,1%, ahanini bitewe n’ibiciro by’amafunguro n’icumbi byazamutseho 2,9%.