Urukiko rwo mu Gihugu cy’Uburusiya rwaciye Google ihazabu y’amadorari ya Amerika angana na $20,000, 000, 000, 000,000,000, 000, 000, 000, 000, 000, amafaranga aruta ari ku isi yose.
Google yaciwe aya mafaranga kubera ibirego bya televiziyo 17 zo mu Burusiya ziyishinja gufunga imiyoboro yazo ya You Tube kubera ibihano mpuzamahanga byafatiwe Uburusiya nyuma yo gutangiza intambara kuri Ukraine.
Televiziyo zareze Google zirimo nka Russia 1, umuyoboro wa Russia Today y’umunyamakuru ushyigikiye Putin, Margarita Simonyan n’izindi.
ikinyamakuru RBC gitangaza ko umucamanza i Moscou yise uru rubanza ngo ni “ikirego kirimo zero nyinshi cyane”,
Iki kinyamakuru gikomeza kivuga ko ihazabu yagiye yikuba kabiri buri cyumweru kuva muri 2020, ku buryo igeze kuri 20, 000, 000, 000, 000, 000, 000, 000, 000, 000, 000, 000 (20 decillion dollars).
Raporo ya Google yo mu gihembwe cya gatatu yerekanye ko yungutse miliyari 88.2 z’amadorari ku buryo nta cyizere ko ishobora kwishyura iyi hazabu idasanzwe. Iki gihano kandi kiruta agaciro ka Google ku isoko ka tiriyari 2 z’amadorari ya Amerika.
Banki y’Isi yerekana ko ubukungu bw’isi bwose bungana na tiriyoni 100 z’amadorari (100 rikurikiwe n’amazeru 12).
Ubaze uhita ubona ko imibare ikiri mike cyane kugira ngo igere ku gihano gikomeye cyagenewe Google.
Google yafunze ishami ryayo mu Burusiya mu 2022 nyuma y’uko Perezida Vladimir Putin atangije intambara na Ukraine. Ishami ryayo, Google LLC, ryatangaje ko ryahombye, ariko serivisi zayo nyinshi zirimo gushakisha kuri internet no kuri YouTube ziracyagerwaho n’abaturage b’u Burusiya.
Mu gihe Leta y’Uburusiya yafunze imbuga zimwe nka Twitter na Facebook, ntiyigeze ifunga serivisi za Google.
Gusa Google ikomeje kotswa igitutu kuko yananiwe gusiba ibyo Leta y’Uburusiya yita ko bitemewe n’amategeko ndetse no kuba yarafunzwe imwe mu miyoboro ya You Tube y’ibitangazamakuru binyuranye byo mu Burisiya.
Urubuga rwa YouTube rwafunze shene yitwa Tsargrad TV ya Konstantin Malofeev ushinjwa gukora poropaganda y’Uburusiya.
Bishoboka ko Google itazagera ubwo icibwa ihazabu ikubye ‘googol- ten-duotrigintillion dollars’ cyangwa se 1 inkurikiwe na zeru 100.