US Monastir yo muri Tunisia, Petro de Luanda yo muri Angola na Kriol Star yo muri Cap-Vert zabonye itike y’imikino ya nyuma muri Basketball Africa League 2025.
Aya makipe yabigezeho kuri iki Cyumweru, tariki ya 13 Mata 2025 nyuma yo kuyobora Sahara Conference yari imaze iminsi ikinirwa i Dakar muri Sénégal.
US Monastir, yigeze no kwegukana BAL mu 2022, niyo yabaye iya mbere mu iri tsinda nyuma yo gutsinda imikino 4 itsindwa ibiri. Ku munsi wa nyuma iyi kipe yo muri Tunisia yatsinze AS Ville de Dakar yariri mu rugo amanota 77 Kuri 68.
Petro de Luanda, ifite igikombe giheruka nayo yabonye itike nyuma yo gutsinda imikino itatu itsindwa itatu. Ku munsi wa nyuma iyi kipe yatunguwe na Kriol Stars yo muri Cap Vert iyitsinda ku isegonda rya nyuma, umukino iwutakaza ityo n’amanota 71-69.
Iyo nsinzi ya Kriol Star yatumye nayo ihita ibona itike nk’ikipe yatsinzwe neza (Best loser) kuko nayo yatsinze imikino itatu itsindwa itatu, bikaba byayifashije no gukora amateka yo kuba ariyo kipe ya mbere muri Cap Vert yari yitabairiye imikino yo gukina BAL ikaba inabonye itike yo gukina imikino ya nyuma.
Ikipe ya AS Ville de Dakar yariri mu rugo kandi ikaba ari imwe mu zahabwaga amahirwe ariko ntiyahiriwe muri iri rushanwa kuko niyo yabaye iya nyuma muri iri tsinda nyuma yo gutsinda imikino 2 igatsindwa ine bitari bihagije ngo ibone itike.
Aya makipe yabonye itike aje yiyongera kuri Al Ittihad yo mu Misiri na Rivers Hoopers yo muri Nigeria nayo aherutse kubona itike mu itsinda rya Kalahari (kalahani conference).
Andi makipe azamemyekana nyuma ni ayo mu itsinda rya Nile (Nile conference) rizatangira taliki 17 kugeza 25 Gicurasi 2025 i Kigali muri BK Arena. Iryo tsinda rigizwe na APR BBC (Rwanda) Al Ahli Tripoli yo muri Libya, Made by Basketball (MBB) yo muri Afurika y’Epfo ndetse na Nairobi City Thunder yo muri Kenya nizo zizaba zihatanye.
Amakipe umunani niyo akina imikino ya nyuma ya Kamarampaka (Playoffs) kugeza ubu hamaze kuboneka amakipe 5 ibyo bivuze ko hasigaye kuboneka amakipe atatu, abiri akaba azava mu itsinda rya Nile mu gihe indi kipe imwe yatsinzwe neza (Best loser) izava hagati y’itsinda rya Nile na Kalahari.
Muri aya matsinda, hakinwa imikino ibanza n’iyo kwishyura. Amakipe abiri ya mbere azabona itike y’imikino ya nyuma (Play offs), mu gihe andi abiri azava mu yatsinzwe neza.
Mbere yo gutangira imikino ya nyuma izabera muri Afurika y’Epfo tariki ya 6 kugeza kuya 14 Kamena 2024, amakipe umunani akina imikino yo gutondeka urutonde, mbere yo gutangira gukuranwamo muri ¼, ½ ndetse n’umukino wa nyuma.
Ikipe ya Petro de Luanda yo muri Angola niyo ifite igikombe giheruka aho yari yatsinze Al Ahly Ly yo muri Libya ku mukino wa nyuma, umukino wabereye muri BK Arena i Kigali, akaba ari nayo kipe yonyine ifite iki gikombe munsi y’ubutayu bwa sahara kuva BAL yatangira mu 2020.