Ikipe ya APR BBC yatsinze KPA yo muri Kenya amanota 99- 61 mu mukino w’irushanwa ryo Kwibuka Jenoside yakorewe Abatutsi mu 1994.
Uyu mukino wabereye muri Petit Stade kuri uyu wa Kane, watangiranye imbaraga n’imbaduko ku ikipe ya APR ihita ifatirana KPA itaribona mu mukino iyitsinda amanota 9 ku busa mu minota ibiri ya mbere ibifashijwemo na Mpoyo Axel watsinze atatu inshuro ebyiri zikurikiranya.
Icyakora ntibyakomeje gutyo kuko KPA nayo yahise itangira kubona inkangara igabanya ikinyuranyo ibifashijwemo na Morel Spencer bityo agace ka mbere karangira APR iyoboye n’amanota 26-21 ya KPA.
Mu gace ka kabiri abakinnyi nka Chasson na Ndoye n’abakinnyi bashya bari bitezwe muri uyu mukino bafashije ikipe y’ingabo z’igihugu gukomeza kuyobora umukino ari nako bongera ikinyuranyo bituma agace ka kabiri karangira harimo ikinyuranyo cy’amanota 18, ibyatumye igice cya mbere kirangira APR iyoboye n’amanota 53-35.
Nyuma y’ikiruhuko byari byitezwe ko KPA igiye kwiminjiramo agafu ariko byabaye iby’ubusa kuko APR yakomeje gucurika ikibuga ibifashijwemo na Justin watsinze amanota 3 inshuro eshatu zikurikiranya ari nako ikinyuranyo kiyongera.
Muri aka gace KPA yakomeje kugorwa no kwihagararaho kubera umunaniro wo gukina imikino ibiri ku munsi umwe aho saa sita bari bakinnye na REG BBC nk’umukino w’ikirarane wari kuba wabaye mu ijoro ryabanje ariko kubera KPA yaritaragera mı Rwanda ntiwaba.
Aka gace karangiye karangiye APR ikiyoboye n’amanota 75 -45.
Mu gace ka nyuma, umukino wakomeje kugenda muri uwo mujyo abarimo Justin na Otobo bakomeza gutsindira APR, umukino urangira ari amanota 99-61.
Uretse umukino wa APR BBC na KPA, kuri uyu wa Kane saa kumi n’ebyiri n’igice habanje undi mukino wagaragayemo ihangana rikomeye cyane kuko UGB yatsinze bigoranye Dar City BBC yo muri Tanzania amanota 75-74.
Mbere, ku isaha ya saa sita, KPA yakinnye na REG BBC, umukino urangira KPA itsinze n’amanota 58-55.
Mu bagore APR W BBC yatsinze Kepler amanota 58-55, mu gihe JKL lady Dolphins yatsinze 96-73 EAUR.
Biteganyijwe ko irushanwa rikomeza kuri uyu wa Gatanu hakinwa imikino ya nyuma mu matsinda.
Ku isaha ya 13:30 pm, KPA W BBC irakına na APR W BBC, saa 16:00 REG W BBC ikine na JKL lady Dolphins.
Mu bagabo, ku isaha ya saa 18:30 Dar City BBC irakina na Patriots mu gihe ku isaha ya saa 21:00, APR BBC iri bukine na REG BBC. Imikino yose irabera muri Petit Stade.