Ikipe ya Sosiyete y’igihugu Ishinzwe Ingufu (REG W BBC) yatangiye imikino ya kamarampaka ibona intsinzi nyuma yo gutsinda APR W BBC amanota 68-67 mu mukino wa mbere.
Ni umukino wa mbere , wakinwe mu Ijoro ryo kuri uyu wa gatanu, tariki 04 Ukwakira 2024 ubera muri Petit Stade Amahoro ndetse witabirwa n’abantu barimo na Minisitiri wa Siporo , Bwana Nyirishema Richard.
Aya makipe yombi yageze ku mukino wa nyuma atsinze aya Groupe Scolaire Marie Rene ndetse na Kepler W BBC muri 1/2 cya Betpawa Playoffs.
Igice cya mbere cyatangiye amakipe yombi agendana mu manota by’ umwihariko mu gace ka mbere birangira APR W BBC ikegukanye ifite amanota 22-15 ya REG.
Mu gace ka kabiri ikipe ya REG W BBC yagarukanye imbaraga yegukana aka gace ku manota 25-8.
Ineza Sifa wa APR wujuje amakosa 3 mu gice cya mbere byahaye ikipe ya REG kuyobora iki gice n’amanota 40-30.
Agace ka gatatu umukino wahinduye isura amakipe yombi aratsindana. Aka gace karangiye REG ikomeje kuyobora umukino n’amanota 53-46.
Mu gace ka nyuma, Ikipe y’Ingabo yiminjiriyemo agafu, Uwizeye Assouma na Diakite batsinda amanota menshi ikinyuranyo gishiramo.
Iminota ibiri ya nyuma, Ikipe ya Sosiyete y’Igihugu Ishinwe Ingufu yujuje amakosa bifasha APR cyane.
Umugwaneza yakomeje gutsindira iyi kipe amanota ariko REG nayo igakina nk’ikipe nkuru ishaka kongera ikinyuranyo cy’amanota
Agace ka nyuma APR yagatsinze ku manota 21-15 ya REG.
Ibi byatumye, ikipe ya REG W BBC yegukana instinzi ku giteranyo cy’amanota 68-67 ya APR W BBC.
Umukino wa Kabiri uzaba kuri iki cyumweru tariki 06 Ukwakira 2024.