Ku mugoroba wo kuri iki Cyumweru, tariki ya 22 Nzeri 2024, Ikipe y’Ingabo z’Igihugu (APR BBC) imaze gutwara igikombe cya Shampiyona ya Basketball mu Rwanda.
Ni nyuma yo gutsinda Patriots BBC amanota 73 kuri 70 mu mukino wa 6 w’imikino ya nyuma ya kamarampaka wabereye muri BK Arena.
APR BBC n’ubundi yaje gukina uyu mukino ifite amahirwe yo kwegukana igikombe, kuko mu mikino 5 iheruka, APR yari yaratsinze itatu 3, ikeneye undi 1 kugira ngo itware igikombe.
Kimwe mu byongereye amahirwe APR BBC ni uko umukinnyi ngenderwaho wa Patriots BBC Willy Perry atabashije gukina uyu mukino kubera imvune afite.
Mu gace ka mbere, APR BBC yagatangiye neza gusa mu mpera zako Patriots BBC ituruka inyuma ndetse irakegukana ku manota 19-17.
Mu gace ka kabiri, APR BBC yakosoye amakosa abarimo Mpoyo, Ntore bafasha iyi kipe kukegukana n’amanota 19-14.
Igice cya mbere cyarangiye APR BBC iyoboye umukino ku manota 36-33.
Agace ka gatatu APR BBC yagarutse iri hejuru itsinda amanota 25 kuri 18 ya Patriots BBC bityo berekeza mu gace ka Kane bafite impamba gusa Patriots BBC ituruka inyuma irakegukana ku manota 19-12.
Umukino wose warangiye ikipe ya APR BBC itsinze umukino ku manota 73-70, ihita yegukana Igikombe cya Shampiyona, naho Isaiah Miller Jaleel wa APR aba umukinnyi mwiza wa Kamarampaka (Betpawa Playoffs).
APR BBC yegukanye igikombe cya 15 mu mateka ya Shampiyona y’u Rwanda, izahagarira u Rwanda mu mikino ya Basketball African League (BAL) 2025.