Minisiteri y’Uburezi yatangaje amanota y’ibizamini bya Leta bisoza amashuri abanza n’icyiciro rusange cy’amashuri yisumbuye igaragaza ko uturere turimo amashuri yatsindishije neza tuyobowe na Kirehe
Abanyeshuri bakosowe mu bizamini by’amashuri abanza ni 277 593 aho batsinze ku kigero 88,21% bavuye kuri 75,6% mu 2024/2025. Abakobwa batsinze ni 87,1% na ho abahungu ni 89,59%.
Uturere tuza imbere y’utundi mu gutsindisha ku kigero cyo hejuru mu bizami bya Leta bisoza amashuri abanza ni Kirehe yatsinze kuri 99,88%, Ngoma iri ku kigero cya 95,27% na Musanze batsindishije ku kigero cya 93,90%.
Uturere tuza inyuma muri icyo cyiciro ni Gasabo, aho batsinze ku kigero cya 82,23%, Gisagara ku kigero cya 81,78% na Nyamagabe ku kigero cya 81,45%.
Mu cyiciro rusange cy’amashuri yisumbuye, Kirehe n’ubundi iyoboye utundi turere kuko yatsindishije ku kigero cya 99.98%, ikurikirwa na Musanze iri ku kigero cya 96.63%, naho Karongi ikaza ku mwanya wa gatatu kuko yatsindishije ku kigero cya 94.77%.
Uturere twgize amanota yanyuma mu cyiciro rusange cy’amashuri yisumbuye, ni Gakenke, aho batsinze ku kigero cya 76.37%, Gasabo ku kigero cya 74.63% na Nyarugenge batsinze kuri 71.41%.
Muri rusange, umuyobozi Mukuru w’Ikigo cy’Igihugu Gishinzwe Ibizamini n’Ubugenzuzi bw’Amashuri (NESA), Dr. Bahati Bernard, yagaragaje ko muri uyu mwaka w’amashuri abanyeshuri bagaragaje gutsinda ku rwego rwo hejuru ugereranyije n’umwaka ushize.
Dr. Bahati Bernard, Umuyobozi Mukuru wa NESA
Yagaragaje ko mu banyeshuri bakoze ibizamini bisoza amashuri abanza, umubare munini uri hejuru y’amanota 50% kandi benshi bari hejuru y’amanota 90%.
Nko mu bizamini bisoza amashuri abanza, yagaragaje ko mu 2025 abana bari bafite hagati y’amanota 30% na 40% bari ibihumbi 10 birenga, ariko muri uyu mwaka baragabanyutse baba ibihumbi bine.
Akomeza agaragaza ko no kubarangije icyiciro rusange cy’amashuri yisumbuye, naho ariko bimeze kuko abatsinzwe bagabanyutse ugereranyije n’umwaka washize. Ibi bigaragaza ko bavuye mu byiciro byo hasi bazamura urwego rw’imitsindire.
Iyi mitsindire yiyongereye biturutse kuri gahunda leta yashyizeho yo gusibiza abana batabashije kubona amanota fatizo yo kwimukira mu mwaka ukurikiyeho.
Aya manota asohotse mugihe habura igihe gito ngo abanyeshuri bose bajye gutangira umwaka w’amashuri 2026-2027.
Umwanditsi: Umutesi Josiane