Umunya-Venezuela Maria Corina Machado, utavuga rumwe na Leta muri Venezuela, yahawe Igihembo cy’Amahoro cya Nobel kubera uruhare rwe mu guteza imbere amahoro no kurengera demokarasi muri Amerika y’Epfo.

Machado yatangajwe n’akanama gatanga iki gihembo nk’uwatsinze, mu muhango wabereye i Oslo muri Norvege kuri uyu wa Gatanu.

Machado yagaragaye cyane mu ruhando rwa politiki rwa Venezuela, aho mu mwaka ushize yashakaga kwiyamamariza umwanya w’Umukuru w’Igihugu ariko ntiyemererwe kwiyamamaza.

Ibi byatumye yirengagizwa mu matora y’umwaka ushize y’umukuru w’igihugu yatsinzwe na Perezida Nicolas Maduro. Ayo matora yanenzewe cyane n’amahanga kubera bayashinja kuba atarabaye mu bwisanzure no mu mucyo.

Guhera nyuma y’ayo matora, Machado amaze igihe kinini yihishe.

Komite itanga ibihembo bya Nobel yashimye “umuhate we udacogora wo guteza imbere uburenganzira bwa demokarasi ku baturage ba Venezuela” ndetse n’urugamba rwe “rwo kugera ku nzira iboneye kandi y’amahoro iva mu butegetsi bw’igitugu igana kuri demokarasi.”

Machado yahigitse Perezida wa Leta Zunze Ubumwe za Amerika, Donald Trump, wakunze kugaragaza ko ashaka gutsindira iki gihembo kubera avauga ko yahagaritse intambara nyinshi, nyamara kandidatire zo zikaba zari zarafunzwe muri Mutarama , ubwo Trump yatangiraga manda ye ya kabiri ku butegetsi.