Ubuyobozi bw’Umujyi wa Kigali bwatangaje ko hagiye gutangira igikorwa cyo kubarura ibikorwa byose biri i Nyabugogo mu rwego rwo gutegura imirimo yo kuvugurura Gare ya Nyabugogo.
Nk’uko bigaragara mu itangazo ryashyizwe ahagaragara n’Umujyi wa Kigali, iki gikorwa cyatangiye ejo ku wa Kane, tariki ya 17 Mata 2025, kikazakorwa n’abakozi b’isosiyete y’abashinzwe ubujyanama mu by’ubwubatsi n’ibidukikije, BESST, aho hazabarurwa ibirimo inyubako n’ubucuruzi.
Iri tangazo rigira riti “Abafite ibikorwa n’imitungo mu gace gaherereyemo gare ya Nyabugogo cyangwa mu bindi bice biteganyirijwe kwimurirwamo igihe imirimo yo kuvugurura izaba ikorwa, barasabwa ubufatanye n’ubwitabire mu gutanga amakuru akenewe.”
Amakuru asabwa arimo ibyangombwa byerekana uwo umutungo ubaruweho, n’ibimenyetso by’uburenganzira ku mutungo cyangwa ubucuruzi buhari.
Umujyi wa Kigali wihanangirije ko: “Ibikorwa byose bitazabarurwa muri iki gikorwa bitazitabwaho mu gihe cyo kwimura.”
Umushinga wo kuvugurura Gare ya Nyabugogo uteganyijwe gutangira muri uyu mwaka 2025 ukazarangira muri 2027, ukazatwara hagati ya miliyoni 100 na 150 z’amadorari ya Amerika.
Iyi gare nshya izaba ari ihuriro ry’imodoka zitwara abagenzi mu buryo butandukanye (multimodal transit hub), izafasha mu koroshya ingendo hagati y’uduce tw’Umujyi wa Kigali ndetse no mu zindi ntara z’u Rwanda, n’ibihugu bihana imbibi.
Hazubakwa inzu igezweho isimbura iyari isanzwe ikoreshwa, hagamijwe gutanga serivisi zihuse kandi zinoze ku bagenzi.
Uyu mushinga kandi ujyanye n’icyerekezo cy’Umujyi wa Kigali cyo guhuza uburyo bwose bwo gutwara abantu n’ibintu harimo imodoka rusange, moto, amagare n’inzira z’abanyamaguru, bigafasha mu gutanga uburyo bwo gutwara buhuje kandi burambye.
Hazashyirwamo ibikorwaremezo byangiza ibidukikije ku rugero ruto, hakoreshejwe ingufu zisubira, uburyo bunoze bwo gukoresha amazi, n’imyubakire yita ku bidukikije.
Ibindi bizubakwa birimo: aho imodoka zitwara abagenzi zizajya zihagarara, ibyumba by’abagenzi bategererezamo, ibiro by’ubuyobozi, amaduka n’andi mashami y’ubucuruzi, ibikorwaremezo byorohereza abafite ubumuga, ibyuma byerekana amakuru ndetse n’uburyo bwo kwishyura hakoreshejwe ikoranabuhanga. Hazanashyirwamo ubwiherero bugezweho, ahabugenewe ho kuruhukira no kwidagadurira n’ibindi bikoresho bifasha mu mibereho myiza y’abazajya bahakorera cyangwa bahanyura.