Ni imwe muri weekend zagaragayemo ihangana ryo ku rwego rwo hejuru muri shampiyona ya basketball mu Rwanda, aho ikinyuranyo cy’amanota amakipe yatsindaye yose uretse Patriots BBC yatsinze Kepler BBC igashyiramo ikinyuranyo cy’amanota agera ku mibare ibiri (2digits) ntayindi kipe yarengeje amanota 7.
Mu mpera z’icyumweru dusoje shampiyona y’icyiciro cya mbere mu bagabo yari yakomeje hakinwa imikino yo ku munsi wa 11 na 12.
Mu mikino yabaye, ku wa Gatanu, tariki 7 Werurwe 2025, ikipe ya UGB yatsinze Espoir BBC ku manota 64-62, Tigers BBC itsinda Orion BBC ku manota 81-74 ndetse APR BBC itsinda REG BBC ku manota 64- 61.
Ni mu gihe mu mikino yabaye ku Cyumweru, tariki 9 Werurwe 2025, ikipe ya Orion BBC yatsinze AZOMCO ku manota 87-84, UGB itsinda Tigers BBC ku manota 76-75 ndetse Patriots BBC itsinda Kepler BBC ku manota 84-67.
Nyuma y’umunsi wa 12, APR BBC ikomeje kuyobora urutonde rwa shampiyona by’agateganyo n’amanota 14, igakurikirwa na REG BBC ifite amanota 13, UGB ku mwanya wa 3 n’amanota 11, iyanganya na Patriots BBC ariko ifite ikirarane, Kepler iri ku mwanya wa 5 n’amanota 10, iyanganya na Tigers BBC, hakaza Orion n’amanota 9, ku mwanya wa 7, Espoir BBC ku mwanya wa 8 n’amanota 8 ndetse AZOMCO iri ku mwanya wa nyuma (9), n’amanota 7 akabariyo kipe kugeza uyu munsi itaratsinda umukino n’umwe nyuma yo kuzamuka mu kiciro cya mbere uyu mwaka.
Patriots BBC ni yo kipe imaze gukina imikino 6 mu gihe andi makipe amaze gukina imikino 7.
Ibi bivuze ko amakipe amaze gukina imikino 7, asigaje umukino umwe ngo asoze imikino ibanza ya shampiyona.
Ku wa gatanu tariki ya 14 werurwe, 2025 biteganyijwe ko shampiyona izakomeza hakinwa umunsi wa 13.
Ku isaha ya 17:00 AZOMCO BBC izakina na UGB. Nyuma y’uwo mukino, saa 19:00- KEPLER BBC izakina na TIGERS BBC mu gihe nyuma y’iyo mikino hazakurikiraho umukino w’ishiraniro hagati ya PATRIOTS BC VS REG BBC ku isaha ya 21:00 z’ijoro.
Ni mu gihe ku cyumweru hazakinwa umunsi wa 14 ku itariki 16 Werurwe 2025 akaba ari nawo munsi wanyuma w’imikino ibanza (First Leg).
Ku isaha ya 16:00 ORION BBC vs ESPOIR BBC nyuma yawo hazakurikiraho undi mukino w’ishiraniro uzahuza APR M BBC vs PATRIOTS BBC ku isaha ya 18:30.
Kuri ubu, Shampiyona ya basketball mu Rwanda iri gukinwa n’amakipe icyenda.