Perezida wa Repubulika y’u Rwanda, Paul Kagame, yakiriye intumwa zigizwe n’abanyamuryango 19 b’umuryango Mpuzamahanga w’Abayobozi Bakiri Bato b’Ibigo n’Abashoramari (Young Presidents’ Organization), YPO, n’abo bashakanye, mu biganiro byibanze ku iterambere ry’u Rwanda n’amahirwe y’ubufatanye mu ishoramari n’ubucuruzi hagati y’u Rwanda na Panama.
Izi ntumwa zakiriwe kuri uyu wa Kabiri tariki 09 Kamena 2026 mu biro by’ umukuru w’igihugu, Urugwiro Village, ziyobowe na Rogelio Romero, uhagarariye YPO Gold Panama akaba n’Umuyobozi Mukuru wa Concretex Panama,sosiyete yo muri Panama ikora ibikorwa byo gukora no kugurisha beto ikoreshwa mu bwubatsi.
Nk’uko byatangajwe n’Ibiro by’Umukuru w’Igihugu, Village Urugwiro ku rubuga rwa X, ibiganiro Perezida Kagame yagiranye n’izi ntumwa byagarutse ku rugendo rw’iterambere n’impinduka u Rwanda rumaze kugeraho mu myaka ishize, by’umwihariko mu guteza imbere ishoramari, guhanga udushya no gushyigikira ba rwiyemezamirimo.
Impande zombi zanaganiriye ku buryo hakomeza kubakwa ubufatanye hagati y’abikorera bo mu Rwanda no muri Panama, hagamijwe guteza imbere ubucuruzi, ishoramari ndetse no guhanga amahirwe mashya y’iterambere ku mpande zombi.
YPO ni umuryango mpuzamahanga uhuza abayobozi b’ibigo n’abashoramari bakomeye bo hirya no hino ku isi barenga ibihumbi 38.000 bo mu bihugu bisaga 130 ku Isi.
Uyu muryango washinzwe mu 1950 ugamije guhuza abayobozi b’ibigo kugira ngo basangizanye ubunararibonye, bigire hamwe, kandi bubake imiyoboro y’ubufatanye mu bucuruzi no mu buyobozi.
Ishami ryawo ryo muri Panama rihuza abayobozi bakuru b’ibigo bikomeye ndetse n’amatsinda y’ishoramari afite uruhare runini mu bukungu bw’icyo gihugu.
U Rwanda rukomeje kwagura umubano n’ibihugu bitandukanye ndetse n’abashoramari mpuzamahanga, mu rwego rwo gukomeza gukurura ishoramari no guteza imbere ubukungu bwarwo bushingiye ku guhanga udushya, ikoranabuhanga n’ubufatanye mpuzamahanga
Umwanditsi: Paul Ushindi Balozi