Kuri uyu Gatandatu, APR FC yatsindiye Rayon Sports kuri Stade Amahoro, ibitego 3-0 mu mukino w’umunsi wa karindwi wa Shampinona ya Rwanda Premier League, bibi imikino 15 yose iyi kipe yambara ubururu idatsinda mucyeba mu mukino ubunsa wa shampiyona.
Mbere y’umukino imande zombi zari zahiganye ubutwari, buri imwe ivuga ko izatsinda ngenzi yayo, ariko ikipe y’ingabo niyo yahatambutse gitwari nyuma yo gutsinda ikipe bahanganiye igikombe cy’uyu mwaka nk’itageze ku kibuga.
Ku munota wa 26 w’umukino, Umugande Ronald Ssekiganda yafunguye amazamu mbere y’uko APRFC itsinda igitego cya kabiri ku munota wa 37 w’ice cyambere. Ni igitego cyatsinzwe na rutahizamu William Togui nyuma y’amakosa yarakozwe n’umuzamu Pavelh Nzira wahoze muri iyi kipe itazirwa ‘Nyamukandagira’.
Mu gice cya kabiri, Rayon Sports yakoze impinduka zitandukanye zirimo gusimbuza kapiteni wayo Serumugo Ali, ariko ntibyagira icyo bihindura ku musaruro. APR FC yakomeje kwihagararaho no gushaka uko yakongera ibitego, ibyagezweho ku munota wa 90+4, ubwo Mamadou Sy yashimangiraga intsinzi atsinda igitego cya gatatu, gisoza umukino ku ntsinzi ikomeye ya 3-0.
Uyu wabaye umukino wa 15 wikurikiranya Rayon Sports itabasha gutsinda APR FC mu mikino ibanza ya shampiyona.
APR FC izasubira mu kibuga ku wa 22 Ugushyingo 2025 ihura na Musanze FC, mu gihe Rayon Sports izakina na AS Kigali ku wa 23 Ugushyingo 2025.
Indi mikino yabaye
Mu y’indi mikino y’umunsi wa karindwi yabaye mu mpera z’iki cyumweru, harimo uwo Mukura VS yatsinzwemo na Gasogi United ibitego 2-0, Musanze FC itsinda Gicumbi FC ibitego 3-2, AS Muhanga yatsindiwe mu rugo na Marine FC ibitego 2-0, Etincelles FC inganya na Rutsiro FC 0-0, mu gihe Gorilla FC yatsinzwe na Amagaju FC igitego 1-0
Nyuma y’imikino irindwi imaze gukinwa, Police FC ni yo iyoboye urutonde rwa shampiyona n’amanota 17, ikurikirwa na Rayon Sports ifite amanota 13.
Mu murongo utukura, AS Muhanga iri ku mwanya wa 15 n’amanota 4, naho Rutsiro FC iri ku mwanya wa nyuma n’amanota 3 gusa.
