Mu ijoro ryo kuri uyu wa Gatanu, tariki ya 20 Nzeri 2024, Ikipe y’ingabo z’igihugu mu mukino w’amaboko wa Basketball yatsinze Patriots BBC amanota 80 kuri 78 mu mukino wa gatanu w’imikino 7 ya nyuma ya kamarampaka.
Uyu mukino APR yatsinze bigoranye, wabereye mu nyubako z’imyidagaduro ‘BK Arena’ aho amakipe yombi yari afite intego yo kuwutsinda kugira ngo biyongerere amahirwe yo gutwara igikombe cya shampiyona y’u Rwanda.
Ni umukino wari ufite icyo uvuze cyane kuko amakipe yombi yanganyaga imikino yatsinze (2-2) mu mikino ine imaze yari imaze gukinwa.
Mu gace ka mbere, APR BBC yatangiye igenda imbere ya Patriots BBC gusa mbere y’uko karangira Patriots BBC ituruka inyuma itsinda APR amanota 24-21.
Mu gace ka kabiri, Patriots BBC yaje iri hejuru itsinda APR ku kinyuranyo gikomeye cyane cy’amanota 13 kuko yatsinze 30-17, ibifashijwemo na Branch, Perry ndetse na Dieudonne.
Ibi byatumye igice cya mbere kirangira Patriots BBC iyoboye umukino n’amanota 54 kuri 38 ya APR BBC.
Agace ka gatatu, ikipe y’Ingabo z’igihugu yagarukanye amashagaga, abarimo Miller na Ntore bavana ikipe ya APR inyuma maze itsinda amanota 20-8.
Mu gace ka Kane, Dialla, Miller bakoze ikinyuranyo kidasanzwe kuri APR bayikura inyuma. Gusa byasabye imbaraga nyinshi kuko amakipe yombi yakomeje kotsanya igitutu cyane, maze yisanga habura amasegonda 7 ikipe ya Patriots BBC ifite amahirwe yo gutsinda umukino, ariko birangira APR BBC yegukanye intsinzi n’amanota 80 kuri 78 ya Patriots BBC.
Ibi byahise bituma, APR BBC yuzuza imikino itatu imaze gutsinda muri iyi mikino ya nyuma mu gihe Patriots BBC yatsinze imikino ibiri.
Mu mikino ibiri isigaye, ikipe ya APR BBC irasabwa byibuze gutsinda umukino umwe (1) ngo itware igikombe mu gihe Patriots BBC yo isabwa gutsinda imikino yombi (2).
Kuva iyi mikino yatangira, Patriots BBC ntiratsinda imikino ibiri yikurikinyaku buryo bigoye kwemeza ko bizayorohera gutsinda imikino yombi isigaye.
