Abaturage bo mu Murenge wa Ruhuha, Akarere ka Bugesera, kuri uyu wa Gatanu bifatanyije n’Abayobozi ba karere kwizihiza Umunsi w’Umuganura wa 2026 wari ufite insanganyamatsiko igira iti: “Umuganura, isoko y’ubumwe n’inshingiro ryo kwigira.”
Muri uwo muhango wabereye mu Kagari ka Gatanga, abaturage batabashije kubona umusaruro baganujwe, hanorozwa inka imiryango ibiri itishoboye mu rwego rwo guteza imbere imibereho myiza n’ubwizigame.
Umuyobozi w’Akarere ka Bugesera, Mutabazi Richard, yavuze ko insanganyamatsiko y’uyu mwaka yibutsa Abanyarwanda ko ubumwe ari bwo shingiro ry’igihugu, naho kwigira akaba ari yo nzira y’iterambere rirambye ridashingiye ku nkunga zituruka hanze.
Yagize ati “Umuganura ni umwanya wo gusubiza amaso inyuma tukibuka ko abasokuru bacu basangiraga umusaruro nk’ikimenyetso cy’ubumwe. Uyu munsi uratwibutsa gukomeza gusigasira indangagaciro z’umuco nyarwanda zirimo gukunda igihugu, gukora umurimo unoze, gufashanya, gutabarana no gusabana.”
Ni mu gihe Umunyamabanga Nshingwabikorwa w’Umurenge wa Ruhuha, Marthe Uwamugira, yavuze ko Umuganura ari umuco nyarwanda wihariye wibutsa Abanyarwanda gushimira ibyo bagezeho, gusangira umusaruro no kongera gutekereza ku byo bagomba gukora kugira ngo ejo hazaza harusheho kuba heza.
Ati “Uyu munsi si uwo kureba gusa ibyo twagezeho, ahubwo ni umwanya wo kwishimira ibyagezweho, gushimira uruhare rwa buri wese no kongera kwiyemeza gukora ibikorwa biteza imbere imiryango yacu. Iterambere rirambye rishingira ku ruhare rwa buri muturage.”
Yakomeje asaba abaturage gukomeza gukorana n’ubuyobozi, kwitabira gahunda za Leta zigamije iterambere, kurangwa n’isuku, kwita ku burezi bw’abana no kwirinda guta amashuri, kwita ku buzima birinda inzoga z’inkorano zitujuje ubuziranenge n’ibiyobyabwenge, guteza imbere ubuhinzi n’ubworozi ndetse no kugira uruhare mu kubungabunga umutekano n’imibereho myiza.
Yibukije kandi ko kwigira bisaba gukora no kudategereza inkunga, avuga ko “akimuhana kaza imvura ihise.”
Inararibonye Ntaganzwa Jean Claude yavuze ko Umuganura wigisha buri Munyarwanda gusuzuma amahitamo yakoze n’umusaruro yagezeho kugira ngo amenye aho yakosheje n’aho akwiriye kongera imbaraga.
Yagize ati “Dukwiye gusubiza amaso inyuma tukareba ibyo twagezeho n’ibyo tutagezeho tukibaza impamvu. Ibyo bizadufasha kongera umusaruro mu mwaka utaha. Tugomba gukura amaboko mu mufuka, tugakora, tukigira kuko igihugu cyubakwa n’abaturage bacyo bakora.”
Mu rwego rwo gushyira mu bikorwa ubutumwa bw’uyu munsi, abaturage batabashije kubona umusaruro baganujwe basangira n’abandi, hanorozwa inka imiryango ibiri itishoboye mu rwego rwo kuyifasha kwiteza imbere no kongera ubushobozi bwo kwigira.
Umunsi w’Umuganura waranzwe no gusangira umusaruro, abaturage bagaragaza ko gukomeza ubumwe, gusangira no gukorera hamwe ari imwe mu nkingi zubaka iterambere rirambye ry’igihugu.
Umwanditsi: Sifa Falka