U Bushinwa bwatangaje ko mbere y’uko uyu mwaka urangira, amavuriro yose yo ku rwego rwa gatatu agomba gutanga umuti utuma abagore batababara (epidural anaesthesia) mu gihe cyo kubyara, mu rwego rwo gushishikariza abagore kubyara mu gihe umubare w’ababyara muri iki gihugu ukomeje kumanuka.
Amavuriro yo ku rwego rwa gatatu – afite nibura ibitanda birenze 500 – agomba gutanga serivisi z’umuti uvanaho ububabare mu gihe cyo kubyara (epidural anaesthesia) bitarenze umwaka wa 2025, mu gihe amavuriro yo ku rwego rwa kabiri – afite ibitanda birenze 100 – agomba gutanga izo serivisi bitarenze umwaka wa 2027, nk’uko Komisiyo y’Igihugu ishinzwe Ubuzima mu Bushinwa (NHC) yabitangaje mu itangazo yasohotse mu cyumweru gishize.
Ubuyobozi bw’u Bushinwa buhanaganye n’imbogamizi zo kongera umubare w’ababyara muri iki gihugu cyo muri Asia, nyuma y’uko umubare w’abaturage ugabanutse ku nshuro ya gatatu yikurikiranya mu mwaka wa 2024. Impuguke zihamya ko uku kugabanuka kuzakomeza kubaho mu myaka iri imbere
Igitangazamakuru cya Leta, China Daily gitanagaza ko hafi 30% by’abagore batwite mu Bushinwa aribo bahabwa umuti uvanaho ububabare mu gihe cyo kubyara, ugereranyije na 70% mu bihugu bimwe na bimwe byateye imbere.
Ishami ry’Umuryango w’Abibumbye ryita ku Buzima (OMS) ryasobanuye ko umuti wa ‘epidural’ wifashishwa mu kugabanya ububabare ukwiye guhabwa abagore batwite kandi bafite ubuzima bwiza ariko babisabye. Uyu muti ukoreshwa cyane mu bihugu byinshi ku Isi, birimo n’u Bufaransa aho hafi 82% by’abagore batwite bawuhitamo, ndetse no muri Leta Zunze Ubumwe za Amerika na Canada aho abarenga 67% bawuhabwa.
NHC yagize iti: “Iki cyemezo kizafasha abagore kumva batekanye kandi banezerewe mu gihe bahabwa serivisi z’ubuvuzi” ndetse “kizongerera ibyishimo abagore mu gihe cyo kubyara.”
Intara nyinshi zo hiryo no hino mu Bushinwa nazo zatangiye kwinjiza ikiguzi cy’umuti uvanaho ububabare mu gihe cyo kubyara mu bwishingizi bw’ubuvuzi, hagamijwe gushishikariza abagore benshi kubyara abana.
Ikiguzi kiri hejuru cyo kurera abana, kudahabwa akazi gahamye, hamwe n’ubukungu buri kugenda bugabanuka, byatumye urubyiruko rwinshi mu Bushinwa rutagishishikazwa no kubaka ingo.
Mu kwezi kwa Kamena, inzego z’ubuzima mu ntara ya Sichuan mu majyepfo y’uburengerazuba bw’u Bushinwa zasabye ko ikiruhuko cy’abashyingiwe cyongerwa kikagera ku minsi 25, naho ikiruhuko cy’ababyeyi b’abagore kikongerwa kikagera ku minsi 150, hagamijwe gufasha kubaka “sosiyete itanga amahirwe kandi itekanye ku bijyanye no kubyara.”