Kuri uyu wa Gatanu tariki 14 Werurwe 2025 mu karere ka Muhanga, abarimu ba kaminuza zigisha itangazamakuru mu Rwanda batangije Ihuriro ‘Rwanda Journalism Educators Network (RJEN)’
Iri huriro rigamije guhuza ubumenyi n’ubushobozi kugira ngo bafashe abo bigisha kumva neza no gukunda umwuga w’itangazamakuru mu rwego rwo gukomeza ireme ry’itangazamakuru mu Rwanda.
Ni ihuriro ryashyizweho ku bufatanye n’ikigo cyo muri Sweden ‘Fojo Media Institute’ binyuze muri Rwanda media programme.
Uyu muryango washinzwe n’abarimu bigisha itangazamakuru mu ri kaminuza enye arizo; Ishuri rikuru Gatolika rya Kabgayi (ICK), Kaminuza y’u Rwanda (UR), East African University Rwanda (EAUR), na Mount Kigali University (MKU).
Umuhango wo gutangiza iri huriro witabiriwe n’abayobozi batandukanye barimo Paul Rapacioli, Umuyobozi wa Fojo Media Institute; Anneli Frank ukurikirana ibikorwa bya Fojo Media Institute mu Rwanda; Prof. Kabera Callixte, Umuyobozi Mukuru wa East African University Rwanda; Padiri Dr. Prudence Bicamumpaka, Umuyobozi wungirije ushinzwe amasomo n’ubushakashatsi muri ICK; Dr. Alphonse Mulefu, Umuyobozi wa CASS muri Kaminuza y’u Rwanda; Mugisha Emmanuel, Umunyamabanga Nshingwabikorwa w’Urwego rw’Abanyamakuru bigenzura RMC); n’abandi barimo abayobozi n’abarimu muri izi kaminuza.
Mu gushinga REJN, abitabiriye inteko rusange bashyizeho amategekoshingiro ndetse banatora komite nyobozi y’uyu muryango.
Avuga kuri iki gikorwa, Rev. Jean Pierre Uwimana, Perezida w’uyu muryango watowe, akaba umwarimu mu Ishami ry’Itangazamakuru muri Kaminuza y’u Rwanda yagize ati:”Intego nyamukuru y’iyi nteko rusange yari ugutangiza ihuriro, guhuza abanyamuryango bawo, gutora komite iyobora, gutegura amategeko awugenga, no gusinya amategeko shingiro,”
Yakomeje agaragaza akamaro ko gukorera hamwe. Ati “Iyo abantu bafite ubunararibonye butandukanye bahuye, bashobora gushinga ikintu gikomeye, mu Rwanda abarimu bigisha itangazamakuru wasangaga bataziranye, ukora ubushakashatsi ugasanga arabukora wenyine ariko ubu tugiye guhuza imbaraga, ubwo bufatanye nibwo buzadufasha kumenya ngo turakora gutya na gutya.”
Abajijwe ku ntego afite nk’umuyobozi w’uyu muryango Rev. Uwimana yavuze ko yiteguye gufasha mu gutuma iri huriro rikomera bityo rikabasha gutanga umusanzu waryo mu guhanga n’ibibazo by’itangazamakuru. Ati “Tuzafasha mu gutuma iri huriro ribaho koko, tumenye ngo ni inde ushobora kwigisha itangazamakuru, ni inde ukwiye kurikora, tuzakorana n’inzego zitandukanye zirishinzwe mu gutuma itangazamakuru koko rikora kinyamwuga.”
Yakomoje kandi ku bakora itangazamakuru bataryize avuga ko iri huriro rizafasha mu guhangana n’iki kibazo. Ati “Mu Rwanda hari abantu benshi bakora itangazamakuru batararyize, bakarikora mu buryo butaribwo, hakazamo guharabika no kubeshya. Iri huriro rero rizadufasha mu gukemura ibibazo bituma abize itangazamakuru batarikora cyane ahubwo rigakorwa cyane n’abatarariyze.”
Emmanuel Mugisha, Umunyamabanga Nshingwabikorwa w’Urwego rw’Abanyamakuru bigenzura (RMC), yavuze ko kwihuriza hamwe kw’abarimu bigisha itangazamakuru ari intambwe ikomeye, yemeza ko ingaruka nyinshi nziza zizagaragara ku rubyiruko rw’ejo hazaza bityo asaba uyu muryango kuzategura amasomo ashobora gufasha abanyamakuru gukemura ibibazo bahura na byo no guhangana n’ibisabwa ku isoko ry’umurimo.
Ati “Iki ni ikintu gikomeye, kuba bihurije hamwe ni izindi mbaraga. Turabasaba ko bazana amasomo, n’inyigisho zisubiza ibibazo dufite uyu munsi ku bumenyi bujyanye n’ikoranabuha butari busanzwe mu masomo yatangwaga mu makaminuza, bahuze imbaraga bahe abanyeshuri ubumenyi bujyane n’ibyo isoko rikeneye.”
Ibisabwa kugira ngo umuntu ajye muri iri huriro ni ukuba ari umwarimu w’Itangazamakuru muri Kaminuza zikorera mu Rwanda.
Ihuriro ryatangijwe uyu munsi, rigizwe n’abarimu 20 baturuka muri Kaminuza 4.
Komite Nyobozi y’iri huriro yatowe igizwe na Rev. Jean Pierre Uwimana watorewe kuba Perezida, Andrew Onsongo, Visi Perezida wa mbere, Dr. Joyce Kirabo, Visi Perezida wa kabiri, Jeanne d’Arc Mukamana, Umunyamabanga na Jean Baptiste Hategekimana watorewe kuba umubitsi.
