Kuri uyu wa mbere tariki ya 7 Ukwakira 2024, umwanditsi w’ibitabo w’Umufaransa, ukomoka muri Cameroun, Charles Onana, yatangiye kuburanishirizwa i Paris mu Bufaransa ku kirego ashinjwa cyo guhakana Jenoside yakorewe Abatutsi mu 1994.
Iki kirego cyatangijwe n’imiryango myinshi, irimo umuryango mpuzamahanga uharanira uburenganzira bwa muntu (FIDH), Survie-France, Umuryango uharanira uburenganzira bwa muntu (LDH), n’umuryango w’abanyarwanda baba mu Bufaransa (CRF).
Uyu mwanditsi Onana ashijwa guhakana Jenoside yakorewe Abatutsi mu gitabo yanditse kitavugwaho rumwe mu mwaka wa 2019 gifite umutwe ugira uti “Rwanda: The Truth About Operation Turquoise”.
Ugenekereje mu Kinyarwanda bivuze “Ukuri Kubijyanye na Operation Turquoise”.
Muri iki gitabo, Bwana Onana yasobanuye ko igitekerezo cy’uko guverinoma y’Abahutu yateguye Jenoside mu Rwanda ari “bumwe mu buriganya bukomeye” bwo mu kinyejana gishize.
Umwunganizi we, Emmanuel Pire, ashimangira ko Onana adashidikanya ko jenoside yabaye, cyangwa se ko itibasiye Abatutsi.
Pire yabwiye ibiro ntaramakuru by’afaransa ‘AFP’ ko igitabo kivugwa ari “umurimo w’umuhanga mu bya politiki ushingiye ku myaka 10 y’ubushakashatsi kugira ngo usobanukirwe n’imikorere ya jenoside mbere, mu gihe na nyuma yayo”.
Bwana Onana, ubu ufite imyaka 60, n’umuyobozi we ushinzwe gusohora ibitabo mu icapiro Editions du Toucan, Damien Serieyx, hashize imyaka ine baregwa kubera igitabo kimwe.
Uru rubanza rwo kuri uyu wa mbere rubaye urwa kabiri ku cyaha cyo guhakana Jenoside yakorewe Abatutsi mu Rwanda ruri kuburanishirizwa mu Bufaransa.
Mu mategeko y’Ubufaransa, ni icyaha guhakana cyangwa kugabanya ukuri kwa jenoside iyo ari yo yose yemewe n’Ubufaransa.
Uru rubanza ruri kubera I Paris, mu Bufaransa, si urwa mbere ruburanishirijwe muri iki gihugu mu manza z’ibyaha bifitanye isano na Jenoside yakorewe Abatutsi kuko hari izindi zarubanjirije zirimo urwa Hategekimana ‘Biguma’, Capt. Simbikangwa Pascal wahoze akuriye ubutasi mu Rwanda, Barahira Tito na Ngenzi Octavier bayoboye komini Kabarondo, Muhayimana Claude wari umushoferi ku Kibuye, Bucyibaruta Laurent wayoboye perefegitura ya Gikongoro n’abandi.