Ikigereranyo cy’ibiciro by’ibicuruzwa (CPI), cyasohowe n’Ikigo cy’Igihugu cy’Ibarurishamibare (NISR) kuri uyu wa 10 Ukwakira 2024 kiragaragaza ko ibiciro by’ibicuruzwa mu Rwanda bikomeje kwiyongera ugereranyije n’umwaka wa 2023 ndetse n’ukwezi kwa Nzeri 2024.
Raporo igaragaza ko igipimo cya CPI mu mijyi cyazamutseho 3.8% ku mwaka, ndetse kikazamukaho 1.5% ugereranyije n’ukwezi kwa Nzeri 2024.
Igipimo cya CPI mu mijyi, gifatwa nk’ikigereranyo nyamukuru cy’ubukana bw’izamuka ry’ibiciro mu Rwanda, cyakorewe ku bicuruzwa 1,622 mu mijyi 12.
NISR ivuga ko ibiciro ku macumbi, amazi, umuriro w’amashanyarazi, gaz, n’ibindi bicanwa, byazamutseho 4.8% ugereranyije n’Ukwakira 2023.
Nk’uko raporo ibigaragaza, urwego rw’ubwikorezi nirwo rwazamutse cyane mu biciro kuko rwageze ku gipimo cya 15.9%, mu gihe ibiciro by’ibiribwa n’ibinyobwa bidasindisha byazamutseho 3.7% ugereranyije n’ukwezi gushize.
Ibiciro by’inyama byiyongereyeho 22.4% ku mwaka, mu gihe amata, ‘fromages’ n’amagi byiyongereyeho 14.8%.
Ibiciro by’ibinyobwa bisindisha, itabi, n’ibindi biyobyabwenge byiyongereyeho 5.6% ku mwaka, mu gihe imyenda n’inkweto byazamutseho 5.6%.
Ku bijyanye n’uduce tw’icyaro, igipimo cya CPI cyagabanutseho 1.5% ku mwaka ariko cyiyongereyeho 2.5% ugereranyije n’ukwezi kwa Nzeri.
Mu gihugu hose, mu mijyi n’icyaro byose byarebwe hamwe, CPI muri rusange yazamutseho 0.5% ku mwaka na 2.1% ugereranyije n’ukwezi kwa Nzeri.
Raporo igaragaza ko itakaza agaciro k’ifaranga ry’u Rwanda hagati yo mu Ukwakira 2024 n’Ukwakira 2023 riri ku gipimo cya 5.1% mu gihe Igipimo cy’itakaza agaciro k’ifaranga ry’u Rwanda ku mwaka, kiri ku mpuzandengo ya 5.8%