Kuri uyu wa mbere, itariki ya 7 Mata 2025, mu Rwanda hose no mu bice bitandukanye by’isi hatangijwe iminsi 100 y’icyunamo ku nshuro ya 31 hibukwa Jenoside yakorewe Abatutsi mu 1994 yatwaye ubuzima bw’inzirakarengane zirenga miliyoni imwe.
Ku rwego rw’Akarere ka Muhanga uyu muhango watangirijwe ku Rwibutso rwa Jenoside yakorewe Abatutsi rwa Kabgayi, aharuhukiye imibiri y’Abatutsi basaga ibihumbi 12,000.
Ni umuhango witabiriwe n’abarimo Musenyeri Balthazar Ntivuguruzwa, Umwepiskopi wa Kabgayi, Myr Smaragde Mbonyintege uri mu kiruhuko cy’izabukuru, Depite Barthélemy Kalinijabo, Musenyeri Louis Pasteur Kabayiza wa Diyosezi Angilikani ya Shyogwe, abatuye mu Karere ka Muhanga n’abandi.
Iki gikorwa cyabimburiwe no kunamira, guha icyubahiro ndetse no gushyira indabo ku mva ziruhukiyemo imibiri y’abasaga ibihumbi 12,000 bashyinguye mu Rwibutso rwa Jenoside rwa Kabgayi.
Umuyobozi w’Akarere ka Muhanga, Madamu Jacqueline Kayitare, yavuze ko hari ibikorwa byinshi bigitoneka abarokotse Jenoside yakorewe Abatutsi bityo aboneraho gusaba abakibikora kubihagarika kugira ngo bareke gukomeza kudindiza inzira iganisha ku bumwe n’ubwiyunge u Rwanda rwihaye.
Yagize ati “Haracyari ibikorwa byinshi bigitoneka abarokotse birimo abagifite ingengabitekerezo ya Jenoside, abayipfobya, abinangira kuvugisha ukuri ku byabaye mu 1994, abanga kwishyura ibyangijwe muri Jenoside, kwiyandukuzaho imitungo, ndetse n’abagikomeje guhisha amakuru y’ahari imibiri y’Abatutsi bishwe muri Jenoside,”
“Turakomeza guhamagarira abafite imyitwarire iteye ityo gusubiza agatima impembero bakazirikana ko igihugu cyacu ndetse n’ubumwe bwacyo twese tubusangiye nk’Abanyarwanda.”
Uretse ibyo kandi Meya Kayitare yashimiye abakomeje kubahiriza ingamba zagiye zishyirwaho na leta hagamijwe kubaka ubumwe bw’Abanyarwanda.
Ati “Turashima ingamba ziba zarashyizweho n’igihugu cyacu, kugira ngo ubumwe bwacu bukomere, bushinge imizi kandi ntibujegajege, muri izo ngamba harimo kutihorera, gukura ubwoko mu byangombwa byose bya buri munyarwanda, gushyiraho uburyo buri munyarwanda wese agira uburenganzira nk’ubwundi ndetse no kugira amahirwe angana kuri bose, tutibagiwe kandi na gahunda ya Ndi umunyarwanda”.
Depite Barthélemy Kalinijabo watanze ikiganiro cy’amateka yaranze Jenoside yakorewe Abatutsi nawe yagaragaje ko Abanyarwanda bavuye kure bityo ko badakwiye gusenya ibyo bagezeho ahubwo ko bakwiye kubyubakiraho bakagera ku mahoro u Rwanda rwifuza.
Depite Kalinijabo kandi yanavuze ko iyi minsi ijana yo kwibuka ikwiye kuba igihe cyo gushyigikirana no kwegera abarokotse ndetse no kwigisha urubyiruko amateka nyayo yaranze Jenoside yakorewe abatutsi muri Mata 1994.
Mu rwego rwo Kwibuka ku nshuro ya 31 Jenoside yakorewe Abatutsi mu 1994, Akarere ka Muhanga karateganya ko muri iki gihe cy’iminsi 100 hazashyingurwa mu cyubahiri imibiri 8, bizakorwa ku itariki ya 2 Kamena 2025 ndetse n’undi mubiri umwe uzashyingurwa ku Rwibutso rwa Kiyumba.
Biteganyijwe kandi ko hazanibukwa abari abacuruzi, abari abakozi ba Leta, ndetse no kwibuka abagore, abana n’urubyiruko bazize Jenoside yakorewe Abatutsi mu 1994.
