Mu rwego rwo guteza imbere ireme ry’uburezi no kugabanya umubare w’abanyeshuri basibira, Ikigo cy’Igihugu Gishinzwe Uburezi bw’Ibanze (REB) cyatangije gahunda yiswe “Nzamura Bushobozi”, igamije gufasha abanyeshuri bafite amanota make kongera ubushobozi mu myigire yabo.
Mu kiganiro n’itangazamakuru, Umuyobozi Mukuru Wungirije w’Ikigo cy’Igihugu Gishinzwe Uburezi bw’Ibanze (REB), Dr. Flora Mutezigaju, yamuritse umusaruro wa ‘gahunda nzamura bushobozi’ yatumye abanyeshuri badasibira ngo batware igihugu andi mikoro yari ugufasha barumuna babo.
Iyi gahunda yafashije abana barenga ibihumbi magana abiri kwimuka, mu gihe mu buryo busanzwe bari gusibira.
Yagize ati: “Umusaruro wayo ugaragarira mu bintu bitanu by’ingenzi. Muri 2024-2025, abanyeshuri barenga ibihumbi 220,000, muri 425,000 bagombaga gusibira, barimutse. Ibi byabafashije kudasigara inyuma y’umwaka umwe.”
Yatanze urugero ati:“Iyo 425,000 bose basibira, igihugu cyari kubatangaho amafaranga arenga miliyari 12. Kuba kimwe cya kabiri cyarimutse bizatuma amafaranga akoreshwa n’igihugu aba make. Ku babyeyi bo n’ubundi bakora inshingano zabo nko kugura amakayi, amakaramu n’ibindi.”
Akomeza avuga ko indi nyungu igaragarira mu myigire n’imyigishirize.
Ati:“Abarimu bigisha Ikinyarwanda, Imibare n’Icyongereza, n’abayobozi bungirije bashinzwe amasomo bahawe amahugurwa mbere y’itangizwa rya gahunda. Tuzakomeza kubigisha neza hakurikijwe gahunda nzamura bushobozi, maze abana bige neza, kandi gusibira nabyo bigabanuke.”
Dr. Mutezigaju agaragaza izindi ngaruka zo gusibira aho agira ati “Iyo umwana asibiye, byongera ubucucike mu mashuri, agatakaza icyizere, rimwe na rimwe agata ishuri. Iyo yimutse, bituma mwarimu nawe abasha kugenzura abanyeshuri yigisha neza.”
Twahirwa Prosper, uhagarariye abarimu mu Rwunge rw’Amashuri rwa Kigina ruherereye mu karere ka Kirehe, yasobanuye imikorere ya gahunda “Nzamura Bushobozi” ku rwego rw’ishuri.
Ati”Iyi gahunda ikorwa umunsi umwe mu mpera z’icyumweru (weekend). Abarimu bareba abanyeshuri bagize amanota ari munsi ya 50%, bakabigisha, hanyuma bagakurikirana bakareba niba hari impinduka zigaragara. Ubu iyi gahunda iracyakomeje, ariko ntabwo turamenya igihe izasorezwa.”
Twahirwa yasobanuye uko umunsi uba uteguye muri iyi gahunda.
Ati”Amabwiriza ya NESA avuga ko umwarimu agomba kwigisha isaha imwe. Ariko twe nk’ikigo ku bufatanye n’abarimu, kubera ubwitange dufitiye abana kuko n’ubundi ni abacu, tubigisha amasaha abiri.”
Yasoje avuga ku musaruro w’iyi gahunda.
Ati”Abigisha muri iyi gahunda ntibahabwa umushahara, ariko bahabwa amafaranga y’urugendo abavana mu rugo ndetse n’abasubizayo. Gahunda yatangiye mu gihembwe gishize, ariko umusaruro wayo nyakuri tuzawusuzuma muri iki gihembwe cya gatatu. Gusa no mu masuzuma duha abanyeshuri, tubona ko hari impinduka nziza yatanze.”
Nubwo iyi gahunda yagaragaje umusaruro ukomeye, haracyari icyifuzo cyo gukomeza kuyinoza hose, kugira ngo abanyeshuri bose bahura n’ibibazo mu myigire yabo bahabwe amahirwe angana yo kongera ubushobozi, bakomeze amasomo yabo ntambogamizi bahuye nazo.
Gahunda “Nzamura Bushobozi” ni icyitegererezo cy’imishinga igamije ireme ry’uburezi n’ubutabera mu mashuri. Ifasha abanyeshuri bafite intege nke mu myigire kubona amahirwe angana n’abandi, bityo ikagabanya ubusumbane mu burezi.
REB Ivuga ko iyi gahunda izasaba ubufatanye bwa buri wese, yaba Leta y’u Rwanda, abarimu, n’ababyeyi kugira ngo igere ku ntego zayo.