Ku mugoroba wo ku wa Gatandatu, ikipe ya Rayon Sports yatsinzwe na Singida Black Stars yo muri Tanzania igitego 1-0 mu mukino ubanza w’ijonjora ry’ibanze rya CAF Confederation Cup wabereye kuri Kigali Pelé Stadium.
Ni umukino watangiye amakipe yombi yigana ubona nta n’imwe irusha indi mu buryo buhambaye. Uko iminota yagendaga niko Singida black stars yagendaga yiha ijambo mu mukino, ibikesha abakinnyi bafite ubunararibonye bari hagati bayobowe na Khalid Aucho na Clatous Chama, byatumye iki ya Rayon Sports igenda itakaza urwego.
Rayon Sports yagowe mu buryo bwo guhanahana umupira kuko imyinshi yayiteraga iyinyuza hejuru ikifatirwa na Singida Black Stars. Iyi kipe kandi yagaragaza intege nke ku ruhande rw’iburyo imbere hakinaga Adama Bagayogo wagize umukino mubi mu minota 45 yakinnye.
Ikipe ya Rayon Sports yatsinzwe urugamba rwo hagati mu kibuga byatumaga itagera imbere y’izamu bituma na rutahizamu Ndikumana Asman wari wizewe atagira icyo agaragaza muri uyu mukino.
Singida Black Stars yari yatangiye kwinjira mu mukino neza ku munota wa 21 yahawe kufura nyuma y’ikosa Nshimiyimana Fabrice wakinaga inyuma ibumoso yakoze, maze umupira w’umuterekano uterwa neza na Clatous Chama, ku burangare Rayon Sports yagize mu rubuga rw’amahina, Marouf Tchakei wari uhagaze wenyine atsinda igitego n’umutwe umuzamu Pavelh Ndzila ntiyamenya uko byagenze.
Igitego kimwe rukumbi cyagaragaye muri uyu mukino cyatsinzwe na Singida Big Stars
Nyuma yo kubona igitego Singida Black Stars yakomeje kuyobora umukino kugeza isoje igice cya mbere ifite igitego 1-0.
Igice cya kabiri Rayon Sports yatangiranye impanduka ikuramo Adama Bagayogo wari wagowe n’ umukino ishyiramo Aziz Bassane wahise akina ibumoso imbere maze Habimana Yves wari uhari ajya iburyo.
Mu buryo bwo gushaka igitego cyo kwishyura, ku munota wa 62 Habimana Yves yavuyemo asimburwa na Tony Kitoga, Rayon Sports ku munota wa 64 yabonye uburyo bwa mbere bukomeye mu mukino ubwo Tambwe Gloire yahinduriraga umupira imbere iburyo maze unyura mu rubuga rw’amahina ugendera hasi, rutahizamu Ndikumana Asman ashatse kuwushyira mu izamu agwa hasi ntiwamukundira.
Ku munota wa 67 Singida Black Stars nayo yahushije uburyo bwabazwe ubwo Nshimiyimana Fabrice yahaga umupira n’umutwe umunyezamu Pavelh Ndzila ntumugereho, Clatous Chama wari uri gutera igitutu uyu musore, yahise awutwara ariko umunyezamu amubuza kuwushyira mu izamu, bawurwanira kugeza awuteye ariko uca ku ruhande.
Rayon Sports yakomeje gukora impinduka zitandukanye zirimo aho yakuyemo Ndayishimiye Richard agasimburwa na Mohamed Chelly mu gihe Tambwe Gloire we yasimbuwe na Ishimwe Fiston.
Nubwo umutoza wa Rayon Sports yakomeje gukora impanduka ariko abakinnyi yashyize mu kibuga ntacyo bahinduye ku byo basanganye bagenzi babo mu kibuga maze iminota 90 isanzwe y’umukino yuzura bikiri igitego 1-0 hongerwaho indi itanu.
Mu minota itanu y’ inyongera rutahizamu Asman Ndikumana yagize imvune ku kuboko yatumye imbangukira gutabara yinjira mu kibuga, birangira anavuyemo ariko kuko gusimbuza byari byarangiye, Rayon Sports isoza umukino ari abakinnyi 10 itsizwe igitego 1-0.
Umukino wo kwishyura uzabera i Dar es Salaam ku wa Gatandatu, tariki ya 27 Nzeri 2025, ikipe izakomeza hagati y’izi zombi, izahura n’izakomeza hagati ya Flambeau du Centre yo mu Burundi na Al Akhdar yo muri Libya.
Rayon Sports yatsinzwe umukino wa mbere wa CAF Confederation Cup
Singida Black Stars yatahanye impamba y’igitego kimwe
