Minisitiri w’Ubumwe bw’Abanyarwanda n’Inshingano Mboneragihugu (MINUBUMWE), Dr. Bizimana Jean Damascène, yasabye urubyiruko rwitabiriye Itorero Indangamirwa icyiciro cya 15 gukomeza umurage w’ubutwari n’ubumwe, bagaharanira ukuri gushingiye ku mateka nyayo y’u Rwanda.
Ibi yabigarutseho ku wa Mbere, tariki ya 4 Kanama 2025, mu kiganiro yagejeje Ku rubyiruko rwasuye Urwibutso rwa Jenoside yakorewe Abatutsi rwa Kigali ruherereye ku Gisozi, banunamira inzirakarengane zisaga ibihumbi 259 zihashyinguwe.
Minisitiri Bizimana yibukije ko amateka mabi yagejeje u Rwanda kuri Jenoside yakorewe Abatutsi mu 1994, yatangijwe n’ubutegetsi bw’abakoloni bwashyizemo Abanyarwanda amacakubiri.
Yagize ati: “Abakoloni banditse, banigisha amateka y’u Rwanda ashingiye ku ivanguramoko, bateranya Abanyarwanda, basenya umuco n’indangagaciro byari bibumbatiye ubumwe.”
Yashimangiye ko urugero rwiza rw’urubyiruko rwa RPF-Inkotanyi rwafashe iya mbere mu rugamba rwo kubohora igihugu rukarwanya ubutegetsi bushingiye ku ngengabitekerezo y’urwango, rugomba kubabera isomo ryiza.
Agira ati: “PARMEHUTU na MRND bashyize imbere amacakubiri, ariko uru rubyiruko rwiyemeje kubirwanya. Niyo mpamvu mugomba kwigira kuri uru rugero, mukarangwa n’ubutwari, mwimakaza ubumwe.”
Uru rubyiruko rwanasabwe guharanira kumenya amateka ashingiye ku ukuri, afite ibimenyetso, bityo bagaharanira kubaka igihugu gishingiye ku bumwe n’ubudaheranwa.
Itorero Indangamirwa icyiciro cya 15 ririmo kubera mu Kigo cy’Ubutore cya Nkumba, mu Karere ka Burera, kuva tariki ya 1 Nyakanga kugeza kuya 14 Kanama 2025.