Kuri uyu wa Gatanu, tariki ya 20 Kamena 2025 haratangira imikino ya nyuma ya Kamparamaka (Playoffs) muri Shampiyona y’u Rwanda ya Basketball, nyuma y’uko shampiyona isanzwe irangiye (regular season).
Ni imikino biteganyijwe ko iri bwitabirwe na APR BBC yabaye iya mbere ikaba ari nayo ifite igikombe giheruka, REG BBC ya kabiri, UGB BBC yabaye iya gatatu na Patriots BBC ya kane.
1. APR BCC
Ikipe y’Ingabo z’Igihugu niyo ifite ibikombe bibiri biheruka bya shampiyona (2023 na 2024), kandi kuri ubu iri guhabwa amahirwe menshi yo kongera kwegukana igikombe.
Abayiha amahirwe bashingira ku kuba yaritwaye neza ku isoko ryo kugura abakinnyi ndetse ikaba iheruka no kwitwara neza muri BAL kuko yegukanye umwanya wa gatatu, ibyatumye iba ikipe ya mbere yo mu Rwanda igeze kuri uwo mwanya ndetse ikaba yaranashyizeho agahigo ko gutsinda amanota menshi mu mukino umwe (123-90) ubwo yatsindaga Al Ittihad yo mu Misiri.
Sibyo gusa kandi kuko umwe mu bakinnyi beza bafite, Aliou Diarra, umukinnyi wo hagati, yatoranyijwe nk’umukinnyi wahize abandi mu gukora ubwugarizi neza (Best Defensive Player) wa BAL 2025.
Mu mikino ya nyuma byitezwe ko APR izishingikiriza ku bakinnyi bayo b’abanyarwanda nka Axel Mpoyo, Ntore Habimana, na Wilson Nshobozwabyosenumukiza.
2. REG BBC
REG, n’ubwo itegukanye igikombe mu myaka ibiri ishize, igaragara nk’imwe mu makipe akomeye mu gihugu.
REG ikunze kugora cyane APR kuko nko mu mukino iheruka guhuramo na APR byasabye ko hashyirwaho iminota y’inyongera. Umukino warangiye APR itsinze REG AMANOTA 64-61.
Iyi kipe kandi ifite umutoza ufite uburambe n’ubushobozi kuko kuko muri 2024, Ogoh Odaudu yatowe nk’umutoza mwiza wa BAL.
Uretse kuba ifite umutoza mwiza, inafite abakinnyi beza kuko nka Jean Jacques Boissy ukomoka muri Senegal yahawe igihembo cy’umukinnyi w’irushanwa (Most Valuable Player, MVP) muri BAL 2025, nyuma yo gufasha Al Ahli Tripoli gutwara igikombe.
Iyi kipe ya Sosiyete y’Igihugu Ishinzwe Ingufu izaba igendera kandi kuri Shyaka Olivier, Muhizi Prince, Cleveland Thomas, Garmine Kande Kieli n’abandi.
Kugeza ubu ntiratangaza niba izongeramo abandi bakinnyi, biyongera kubo isanganywe.
REG imaze kwegukana shampiyona inshuro eshatu (2017, 2021, 2022) kandi yigeze kugera muri ¼ cya BAL mu 2022 no mu 2023.
3. United Generation Basketball (UGB)
UGB niyo kipe yatunguranye muri uyu mwaka, aho yasoje mu makipe ane ya mbere bikayihesha itike yo kwitabira playoffs.
Ubusanzwe yari mu makipe yo hagati muri shampiyona, ariko muri uyu mwaka w’imikino bagaragaje impinduka ikomeye, cyane cyane kubera kwitwara neza ku isoko mu kugura abakinnyi beza.
James Amatoe ukomoka muri Ghana ni umwe mu bakinnyi bafatiye runini iyi kipe kuko yagiye agira uruhare mu mikino iyi kipe yatsinze muri shampiyona isanzwe.
Bafite kandi Mohamed Doumbya wo muri Senegal, aba bakinnyi bakaba barafashije UGB kwitwara neza mu mikino ya shampiyona isanzwe.
4. Patriots Basketball Club
Patriots, imwe mu makipe afite abafana benshi mu Rwanda, nubwo yabashije kwinjira muri playoffs ntabwo yahiriwe cyane muri shampiyona kuko yatakaje abantu benshi bari bayifatiye runini nka Kapiteni wayo Ndizeye Dieudonné n’Umunyamerika William Perry.
Uretse abo kandi, iyi kipe yanatakaje umutoza wari umunyereye shampiyona y’u Rwanda, Heny Mwinuka wayivuyemo mbere y’uko shampiyona.
Icyakora ntibyayibujije kugerageza kwitwara neza babifashijwemo na Sunny Niyomugabo, Umunyarwanda w’imyaka 35 watozaga bwa mbere nk’umutoza mukuru. Niyomugabo akaba yarahagaritse gukina Basketball muri 2023.
Umukinnyi wabo w’ingenzi cyane ni Umunyamerika Elliott Cole, uretse ko iyi kipe iheruka kongeramo Raphael Putney wari kumwe na Rivers Hoopers muri BAL, aho yasanze abandi nka Hagumintwari Steve, Frank Kamdoh n’abandi.
Iyi kipe yitabiriye BAL bwa mbere mu 2021, igera muri ½ cy’irangiza ikaza kurangiza ari iya kane nyuma y’irushanwa rikomeye ryabereye i Kigali.
Muri iyi mikino ya nyuma ya kamaparamaka, mu mikino ya ½ amakipe azatanguranwa intsinzi eshatu, aho izakinwa mu buryo bw’umwiza muri itanu (Best of five), mu gihe mu mikino ya nyuma batanguranwa insinzi enye mu buryo bw’umwiza muri irindwi (Best of Seven).
Biteganyijwe ko ku isaha ya 18:00 z’umugoroba, REG BBC ikina na UGB, mu gihe ku saa 20:00 APR BBC ikina na PATRIOTS BBC. Imikino yose izabera muri BK Arena.