Ikipe ya Al Hilal SC yo muri Sudani yatangaje ko izakina umukino wayo wa mbere muri Shampiyona ya Rwanda Premier League ku wa Kane tariki ya 6 Ugushyingo 2025, aho izahura na Bugesera FC. Ni nyuma y’uko amakipe abiri yo muri Sudani ariyo Al Hilal SC na Al Merrikh SC yemerewe gukina Shampiyona y’u Rwanda mu gihe igihugu cyabo kiri mu bibazo by’intambara.

Nk’uko byemejwe kuri uyu wa Kabiri tariki ya 4 Ugushyingo 2025, Al Hilal SC izakina umukino wa kabiri ku wa Mbere tariki ya 10 Ugushyingo 2025 ihura na AS Kigali.

Al Hilal SC yashinzwe mu mwaka wa 1930, ikaba ari imwe mu makipe akomeye cyane muri Afurika no muri Sudani. Imaze gutwara ibikombe 31 bya Shampinona ya Sudan Premier League, n’ibikombe 10 by’igihugu (Sudan Cup).

Mu mikino mpuzamahanga, iyi kipe yageze ku mukino wa nyuma wa CAF Champions League inshuro ebyiri (mu 1987 na 1992) kandi ihora ibona itike yo kuyitabira. No muri uyu mwaka wa 2025, Al Hilal SC yongeye kugera mu matsinda nyuma yo gusezerera Kenya Police FC mu ijonjora rya kabiri.

Muri CAF Confederation Cup, Al Hilal SC yageze muri kimwe cya kabiri inshuro ebyiri (mu 2004 na 2012).

Mu mikino ya CECAFA Kagame Cup yabaye muri Nzeri 2025, Al Hilal SC yatsinze APR FC ibitego 3–1, ihita yegukana icyo gikombe cyo muri aka karere. Yanageze kandi ku mukino wa nyuma wa Arab Cup Winners’ Cup mu 2001 ndetse no muri kimwe cya kabiri cya Arab Champions League mu 2005.

Ku wa 23 Ukwakira 2025, ni bwo FERWAFA yatangaje ko amakipe abiri yo muri Sudani, Al Hilal SC na Al Merrikh SC, yemerewe gukina muri Rwanda Premier League no gukorera ibikorwa byayo mu Rwanda, kubera imvururu zikomeje mu gihugu cyabo.

Al Hilal SC izajya yakirira imikino yayo ya CAF Champions League kuri Stade Amahoro i Remera.

Al Hilal SC ikomeje imyitozo mu rwego rwo kwitegura umukino izakinamo na Bugesera FC ku Kane w’iki cyumweru