Ku wa Gatandatu tariki ya 20 Nyakanga, muri parikingi ya Sitade yitiriwe Pele i Nyamirambo habereye isiganwa ngarukakwezi ryo gusiganirwa ku magare mu bakiri bato ‘Youth racing cup’.
Kuri iyi nshuro, iri siganwa ryitabiriwe n’ibyiciro bitanu nk’ibisanzwe hashingiwe ku myaka, byombi ni mu bahungu n’abakobwa.
Mu cyiciro cy’abatarengeje imyaka 19, isiganwa ryegukanwe na Ntirenganya Moise wa ‘Les Amis Sportifs’ wakoresheje iminota 42 n’amasegonda 49 mu gihe mu bakobwa ryatwawe na Iragena Charlotte ukinira Ndabaga Women Cycling Team wakoresheje iminota 32 n’amasegonda 7.
Mu cyiciro cy’abafite imyaka 17, isiganwa mu bahungu ryatwawe na Gisubizo Issa wa Les Amis Sportifs wakoresheje iminota 41 n’amasegonda 7 mu gihe mu bakobwa ryatwawe na Ingabire Divine nawe wa Les Amis Sportifs wakoresheje iminota 41 n’amasegonda 11.
Mu batarengeje imyaka 15, isiganwa ryatwawe na Cyusa Habumuremyi wa Les Amis Sportifs wakoresheje iminota 27 n’amasegonda 4 mu gihe mu bakobwa ryatwawe na Riza Jeovajile wa Ndabaga Women Cycling Team wakoresheje iminota 28 n’amasegonda 6.
Mu batarengeje imyaka 13, isiganwa ryatwawe na Sano Francis wa Muhazi Cycling Generation wakoresheje iminota 23 n’amasegonda 25 mu gihe mu bakobwa ryatwawe na Mwamikazi Joyce Cynthia unyongera Benedicition Club wakoresheje iminota 23 n’amasegonda 32.
Mu cyiciro cy’abatarengeje imyaka 11, isiganwa ryatwawe na Zaneti David unyongera Les Amis Sportifs wakoresheje iminota 11 n’amasegonda 19 mu gihe mu bakobwa ryatwawe na Uwamahoro Francoise wakoresheje iminota 11 n’amasegonda 37.
Biteganyijwe ko mu kwezi gutaha iri siganwa rizabera mu Karere ka Bugesera tariki 24 Kanama 2024.