Umukino wa gicuti wahuzaga City FC Abuja yo muri Nigeria na JKU FC yo muri Zanzibar, wahagaritswe by’agateganyo ubwo inzuki zinjiye mu kibuga cya Kwaraa Stadium muri Tanzania, ku wa Gatatu tariki ya 3 Nzeri 2025.
Ibi byabye ku munota wa 78, aho aya makipe yakinaga Tanzanite Preseason Tournament.
Amakuru dukesha Daily News Tanzania avuga ko inzuki zaturutse mu giti kiri hafi y’ikibuga zasagariye abakinnyi, bose bahabwa amabwiriza yo kuryama hasi kugira ngo birinde ko zibakomeretsa cyangfwa ngo zibateze ibindi bibazo.
Si abakinnyi gusa babaye bahagaritse ibyo bari barimo, kuko n’abafata amashusho y’umukino bahise bahagarika akazi kabo kugira ngo inzuki zibanze zishire.
Nyuma y’uko umutekano wari umaze kuboneka, umukino wasubukuwe urangira City FC Abuja itsinze JKU FC ibitego 2–1.
Iri rushanwa ryitabiriwe n’amakipe atandukanye yo mu bihugu bya Tanzania, Kenya na Nigeria, arimo Bandari FC (Kenya), Tabora United (Tanzania), JKU FC (Zanzibar), Namungo FC (Tanzania), City FC Abuja (Nigeria), TDS (Tanzania), Dodoma Jiji (Tanzania), Tanzania Prisons (Tanzania), Coastal Union (Tanzania) na Fountain Gate FC (Tanzania).
Ni irushanwa ryatangiye kuva tariki ya 31 Kanama 2025 , biteganyijwe ko rizasozwa ku ya 7 Nzeri 2025.
