Nibura abantu 11 biciwe mu myigaragambyo yo kwamagana ubutegetsi muri Kenya, naho abandi 567 batawe muri yombi, kuri uyu wa Mbere nk’uko Polisi ibitangaza.
Polisi yarashe ku bigaragambyaga, mbere yaho, Dr Aron Sikuku, umuganga ukorera ku bitaro bya Eagle Nursing Home biherereye mu nkengero za Nairobi, yari yabwiye BBC ko imibiri y’abantu babiri bishwe barashwe yazanywe kuri ibyo bitaro.
Yavuze ko abantu amagana bigaragambyaga bari bateraniye hanze y’ibitaro bye basaba ko bahabwa imibiri y’abo bishwe.
Iyi myigaragambyo yabaye mu rwego rwo kwibuka imyaka 35 yari ishize habaye Saba Saba—bishatse kuvuga “karindwi-karindwi”—yabaye ku itariki ya 7 Nyakanga 1990, ari na yo yatangije urugamba rwo gusaba demokarasi ishingiye ku mashyaka menshi muri Kenya.
Kuva mu gitondo cy’ejo ku wa mbere, abashinzwe umutekano bafunze imihanda yose minini yinjira mu murwa mukuru Nairobi mbere y’uko iyo myigaragambyo itangira.
Mu bindi bice bya Nairobi, habayeho gushyamirana igihe abari mu myigaragambyo bacana umuriro umuriro banagerageza kurengana amabariyeri yashizweho na polisi. Abapolisi babarashe ibyuka biryana mu maso mu kugeragaeza kubatatanya.
Polisi yateye ibyuka biryana mu maso abantu bigaragambirizaga mu mihanada ya Thika, kimwe n’iya Kitengela, igice kiri munyengero y’umurwa mukuru. I Kamukunji, hafi y’ahantu yabereye ‘Saba Saba’, igipolisi cyahanganye n’abantu bari mu myigaragambyo biratinda.
Polisi yasohoye itangazo ku mugoroba wo ku wa Mbere ishimira abapolisi uburyo birinze ku rwego rwo hejuru no kwitwara kinyamwuga nubwo bahuraga n’ihohoterwa rikabije no gushotorwa. Polisi yavuze ko abapolisi 52 n’abasivili 11 bakomerekeye muri iyo myigaragambyo.
Komisiyo y’igihugu ishinzwe uburenganzira bwa muntu (KHRC) yari yatangaje mbere y’aho ko abantu nibura 10 ari bo bishwe.
Mu cyegeranyo, k’iyi komisiyo yashinje igipolisi gukoresha ingufu z’umurengera, nk’uko bimaze kugaragara kenshi muri uru rugendo rw’imyigaragambyo iri kubera muri iki gihe.
Iryo tangazo rivuga ko ku wa Mbere “polisi yakoraga yambaye imyambaro isanzwe kandi ikoresha imodoka zidafite ibimenyetso biyiranga,” ndetse ko yafatanyije n’“imitwe y’abagizi ba nabi bitwaje intwaro” muri Nairobi, Kajiado, Nakuru, Kiambu no muri Eldoret. Polisi yakomeje guhakana ibyo birego.
Iyi komisiyo yakomeje ivuga ko ifite ibimenyetso by’uko nibura abantu babiri bashimuswe, ndetse itangaza ko abantu 29 bakomeretse naho 37 batawe muri yombi mu mijyi itandukanye hirya no hino mu gihugu.
Kuva mu gitondo cya kare ejo, abantu amagana bangiwe kunyura ku mabariyeri, aho bamwe bari ku birometero birenga 10 uvuye mu mujyi rwagati, aho imodoka nke gusa ari zo zari zemerewe kuhanyura.
Mu mujyi wa Nairobi rwagati,imihanda igana mu ahantu hakomeye – harimo nk’ujya ku ngoro y’umukuru w’igihugu, no ku ngoro y’inteko ishinga amategeko – yari ifunzwe
Amwe mu mashuri yasabye abanyeshuri kuguma mu rugo.
Nk’uko byatangajwe n’ikinyamakuru the Nation cyo muri Kenya, imyigaragambyo yabaye mu ntara 17 kuri 47 zigize igihugu.
